ئاسۆی ڕێککەوتنی تاران و واشنتن نرخی ئۆنسەی زێڕی لە بازاڕە جیهانییەکاندا بۆ سەرووی 4,800 دۆلار بەرزکردەوە، هاوکات بانکە نێودەوڵەتییەکان چاوەڕێی پێشهاتە سەربازییەکان دەکەن بۆ دیاریکردنی سیاسەتی دارایی داهاتوو.

بەرزبوونەوەی نرخەکان لە بازاڕی ئاسیا

ئەمڕۆ پێنجشەممە، لە دوای کردنەوەی بازاڕەکانی ئاسیا، نرخی زێڕ دووبارە ئاراستەی بەرزبوونەوەی گرتەبەر. بەپێی ئامارەکان، یەک ئۆنسە زێڕ بە 4,835 دۆلار مامەڵەی پێوەکرا، ئەمەش نیشانەی گەڕانەوەی متمانەی وەبەرهێنەرانە بەم کانزا گرانبەهایە وەک پەناگەیەکی سەلامەت لە سایەی ناجێگیریی سیاسیی ناوچەکەدا.

کاریگەریی گەشبینییە سیاسییەکان لەسەر بازاڕ

بوونی ئەگەری ڕێککەوتن لە نێوان ئێران و ئەمریکا گەشبینییەکی زۆری لە ناو بازاڕە داراییەکاندا دروست کردووە. ئەم دۆخە وای کردووە پێشبینی بکرێت نرخەکانی نەوت و سووتەمەنی لە چەند مانگی داهاتوودا ڕوو لە دابەزین بکەن و ڕێگری لە دەرچوونی هەڵاوسان لە کۆنتڕۆڵ بگرن، ئەم پێشهاتانەش بە ڕوونی قازانجیان بە نرخی زێڕ گەیاندووە.

هەڵاوسان و هەڵوێستی فیدڕاڵ یەدەگی ئەمریکا

سەرەڕای ئەوەی شەڕی ئێران نرخەکانی سووتەمەنی بەرزکردووەتەوە و بووەتە هۆی ئەوەی ڕێژەی هەڵاوسان لە مانگی ڕابردوودا ئاستی 3% تێپەڕێنێت، بەڵام هێشتا بەرپرسانی بانکی ناوەندیی ئەمریکا (فیدراڵ یەدەگ) ڕایاننەگەیاندووە کە بۆ کۆنتڕۆڵی هەڵاوسان سوودی بانکی بەرز دەکەنەوە. بانکەکە لە ئێستادا لە دۆخی چاوەڕوانیدایە بۆ بینینی ئاراستەی کۆتایی جەنگەکە.

پەیوەندیی نێوان سوودی بانکی و نرخی زێڕ

لێدوانەکانی چەندین بەرپرسی بانکی ناوەندیی ئەمریکا ئەوە پشتڕاست دەکەنەوە کە هیچ بڕیارێکی دەستبەجێ بۆ بەرزکردنەوەی سوودی بانکی لە ئارادا نییە. شارەزایان ئاماژە بەوە دەکەن کە ئەگەر لە داهاتوودا بانکەکە بۆ کۆنتڕۆڵی هەڵاوسان سوودی بانکی بەرز بکاتەوە، ئەوا زیانی گەورە بە نرخی زێڕ دەگات، چونکە وەبەرهێنەران ڕوو لە دۆلار دەکەنەوە.