بەڕێوەبەرایەتیی پۆلیسی دارستان و ژینگەی سلێمانی هۆشداریی توند دەداتە سەرپێچیکاران و ڕایدەگەیەنێت، بڕینەوەی دار و ڕاوکردنی نایاسایی سزای پێبژاردن و زیندانیکردنی لەسەرە، هاوکات داوا لە هاونیشتمانیان دەکات بە وێنە و ڤیدیۆ هاوکاریان بن لە ناسینەوەی تێکدەرانی ژینگە.

سزای بڕینەوەی دار و تێکدانی ژینگە

عەمید هوشیار ئەحمەد، بەڕێوەبەری پۆلیسی دارستان و ژینگەی پارێزگای سلێمانی ڕایگەیاند، هەر کەسێک دەستدرێژی بکاتە سەر سروشت لە ڕێگەی بڕینەوەی دار یان تێکدانی ژینگە، پەڕاوی لێکۆڵینەوەی بۆ دەکرێتەوە و ڕەوانەی دادگا دەکرێت. ئاماژەی بەوەش کرد کە سزای ئەم سەرپێچییانە تەنیا پێبژاردنی دارایی نییە، بەڵکو بەپێی جۆری تاوانەکە دەگاتە ئاستی زیندانیکردن.

داواکاری بۆ هاوکاریی هاونیشتمانیان

بەڕێوەبەرایەتی پۆلیسی دارستان داوا لە هاونیشتمانیان دەکات وەک چاوێکی پۆلیس کار بکەن بۆ پاراستنی ژینگەی ناوچەکە. عەمید هوشیار داوای کرد کە لە کاتی بینینی هەر جۆرە سەرپێچییەک، پۆلیس ئاگادار بکەنەوە یان گرتەی وێنەیی و ڤیدیۆیی ئەو کەسانەیان بۆ بنێرن کە دار دەبڕنەوە یان زیان بە ژینگە دەگەیەنن، تاوەکو وەک بەڵگەی یاسایی لە دژیان بەکاربهێنرێت.

ڕێگری لە ڕاوەماسی نایاسایی

سەبارەت بە پاراستنی سامانی ماسی، بەڕێوەبەری پۆلیسی دارستان ئاشکرای کرد کە مەفرەزەکانیان چەندین کەسیان لەسەر ڕاوەماسی دەستگیر کردووە. ئەو کەسانەی دەستگیر کراون، سەرجەمیان ڕێکاری یاساییان بەرامبەر گیراوەتەبەر. پۆلیسی دارستان جەخت دەکاتەوە کە ڕێگە نادەن لە وەرزی قەدەغەکراودا یان بە شێوازی نایاسایی زیان بە سامانی ماسی بگەیەنرێت.

ڕۆڵی مامۆستایانی ئایینی لە هۆشیارکردنەوەدا

لە بەشێکی دیکەی قسەکانیدا، عەمید هوشیار ئەحمەد داوای لە مامۆستایانی ئایینی کرد کە لە وتارەکانی ڕۆژی هەینیدا گرنگییەکی تایبەت بە پرسی ژینگە بدەن. داوای لێکردن هاووڵاتییان هۆشیار بکەنەوە بۆ پاکڕاگرتنی ژینگە و پاراستنی دارستانەکان، چونکە پاراستنی سروشت ئەرکێکی هاوبەشی هەموو چین و توێژەکانە.