سەرۆککۆماری تورکیا فەرمانی ئامادەکاریی بۆ هەڵبژاردنی پێشوەخت دەردەکات و دەیەوێت 25هەمین ساڵیادی دامەزراندنی پارتەکەی بکاتە سەرەتای بانگەشەیەکی نوێ بۆ مانەوەی لە دەسەڵات.

فەرمانی ئەردۆغان بۆ هەڵبژاردنی کۆتایی 2027

ڕۆژنامەی حوڕییەتی نزیک لە دەسەڵات بڵاویکردەوە، ڕەجەب تەیب ئەردۆغان، سەرۆککۆماری تورکیا و سەرۆکی گشتیی ئاکپارتی، لە دوا کۆبوونەوەی ئەنجوومەنی ڕاپەڕاندنی پارتەکەیدا ڕێنمایی داوەتە ئۆرگانەکانی ئاکپارتی تاوەکو دەست بە ئامادەکاریی مەیدانی بکەن. پلانی ئاکپارتی ئەوەیە هەڵبژاردنی پەرلەمان و سەرۆکایەتی لە تشرینی دووەمی ساڵی 2027دا بەڕێوەبچێت، ئەمەش وەک هەنگاوێک بۆ ئەوەی ئەردۆغان بتوانێت جارێکی دیکە خۆی بەربژێر بکاتەوە.

ساڵیادی ئاکپارتی دەکرێتە سەرەتای بانگەشە

ئەردۆغان جەختی کردووەتەوە کە نابێت تەنیا وەک ساڵیادێک تەماشای 25هەمین ساڵەی دامەزراندنی ئاکپارتی بکرێت، کە ڕێکەوتی 14ی ئابی 2026 دەکات. ڕێنمایی داوە کە ئەم بۆنەیە ڕاستەوخۆ بکرێتە تەوەری سەرەکیی هەڵمەتی هەڵبژاردن و لەژێر ناونیشانی "چارەکە سەدەیەک"، چیرۆکی پڕۆژە زەبەلاحەکان و هەنگاوە ئابوورییەکان بۆ خەڵک بخرێنە ڕوو.

وێناکردنی ئەردۆغان وەک پارێزەری ئاشتی

بەگوێرەی پلانی نوێی ئاکپارتی، لە ڕێوڕەسمەکانی ساڵیادی پارتەکە و هەڵمەتی هەڵبژاردندا، چەمکەکانی "ئارامی" و "سەقامگیری" دەکرێنە دروشمی سەرەکی. پارتەکە کار دەکات بۆ ئەوەی ئەردۆغان وەک "سەرکردەیەک کە توانیویەتی تورکیا وەک دوورگەیەکی ئاشتی و سەقامگیری بپارێزێت" وێنا بکات، ئەمەش لە چوارچێوەی هەوڵەکان بۆ سەرلەنوێ بەربژێربوونەوەی.

ڕێکارە دەستوورییەکان بۆ خولی سێیەم

بەپێی دەستووری تورکیا، ئەردۆغان کە دوو خول سەرۆکایەتیی کردووە، ناتوانێت بۆ خولی سێیەم ببێتەوە بەربژێر، مەگەر پەرلەمان پێش تەواوبوونی خولەکەی ئێستا (کە لە 2028 کۆتایی دێت) بڕیاری هەڵبژاردنی پێشوەخت بدات. ئاکپارتی لە ئێستاوە ڕێکخستنەکان و پەرلەمانتارانی بۆ کاری مەیدانی ئەرکدار کردووە تاوەکو پێش کۆتاییهاتنی خولەکە لە ساڵی 2027دا، هەڵبژاردن ئەنجام بدەن و ڕێگا بۆ بەربژێربوونەوەی ئەردۆغان خۆش بکەن.