پارتی دیموکراتی کوردستان بڕیاری دا بەشداری لە کابینە وەزارییەکەی عەلی زەیدی بکات و پەرلەمانتارەکانی متمانە بە حکومەتی نوێ بدەن، ئەمەش دوای ڕێککەوتن لەسەر کۆمەڵێک مەرج و وەرگرتنی چەند پۆستێکی سیادی لە بەغداد.

ئەنجامی دیدارەکانی عەلی زەیدی لە هەولێر

بەگوێرەی زانیارییەکانی کەناڵ8، عەلی زەیدی، سەرۆکوەزیرانی ڕاسپێردراو بە یاوەری شاندێکی چوارچێوەی هەماهەنگی، لە کۆبوونەوەکەیدا لەگەڵ مەسعود بارزانی، نێچیرڤان بارزانی و مەسرور بارزانی، داوای "دەستپێکی نوێ"ی لە پەیوەندییەکاندا کردووە. پارتی دیموکراتی کوردستان ڕەزامەندی دەربڕیوە بۆ بەشداریکردن لە حکومەت و گەڕانەوەی پەرلەمانتارەکانی بۆ دانیشتنەکانی پەرلەمانی عێراق، ئەمەش ئاسوودەیی لای هێزەکانی ناو چوارچێوەی هەماهەنگی دروست کردووە.

مەرج و پۆستەکانی پارتی لە کابینەی نوێدا

پارتی دیموکراتی کوردستان کۆمەڵێک مەرجی بۆ بەشداریکردن لە حکومەت دیاری کردووە کە گرنگترینیان بریتین لە:

پۆستی جێگری سەرۆکوەزیران: (بە وەرگرتنی وەزارەتێکی سیادی یان بە جیا).

مانەوەی وەزارەتی دەرەوە: پارتی سوورە لەسەر وەرگرتنەوەی ئەم وەزارەتە، بەڵام بە کەسایەتییەکی نوێ و گۆڕینی فوئاد حسێن.

وەزارەتی ئاوەدانکردنەوە و نیشتەجێکردن: پارتی دەیەوێت لەم وەزارەتە بەردەوام بێت کە ئێستا لەلایەن بەنگین رێکانىییەوە بەڕێوە دەبرێت.

سەرۆکایەتیی دەستەیەک: ئەگەری زۆرە سەرۆکایەتی "دەستەی وەبەرهێنان" بێت.

ڕێککەوتن لەسەر یاسای نەوت و گاز و کێشە داراییەکان

سەرچاوە ئاگادارەکان ئاشکرایان کردووە کە هەردوولا گەیشتوونەتە ڕێککەوتنێکی سەرەتایی بۆ دواخستنی خستنەڕووی پڕۆژەیاسای نەوت و گاز بۆ پەرلەمان، چونکە بارودۆخی ئێستا بەهۆی ناکۆکییە دەستوورییەکان بە گونجاو نازانرێت. هەروەها ڕێککەوتن کراوە لەسەر ڕاگرتنی هێرشەکان بۆ سەر هەرێمی کوردستان و چارەسەرکردنی کێشە داراییەکان لەگەڵ حکومەتی هەرێمی کوردستان بە شێوەیەکی بنەڕەتی.

کاریگەریی پەیوەندییە تەلەفۆنییەکەی ترەمپ

پاڵپشتییە نێودەوڵەتییەکان بۆ عەلی زەیدی ڕۆڵێکی سەرەکییان لە سەرکەوتنی ئەم لێکتێگەیشتنەدا هەبووە. دوای ئەوەی دۆناڵد ترەمپ، سەرۆکی ئەمریکا پەیوەندی بە زەیدییەوە کرد و پیرۆزبایی لێکرد، پێگەیەکی نێودەوڵەتی بەهێزی پێبەخشی. ئەم پەیوەندییە وایکرد کە لایەنەکان لە هەولێر و بەغداد بە متمانەیەکی زیاترەوە بەرەو ڕێککەوتن هەنگاو بنێن، کە بۆ سەرۆکوەزیرانەکانی پێشوو بەم شێوەیە نەڕەخسابوو.

دابەشبوونی ناوخۆیی هێزە شیعەکان پێش سەردانەکە

پێش ئەوەی عەلی زەیدی بگاتە هەولێر، لە ناو ماڵی شیعە و چوارچێوەی هەماهەنگیدا دوو بۆچوونی جیاواز هەبووە:

بۆچوونی یەکەم: قەیس خەزعەلی، ئەبو ئالا وەلائی و هومام حەمودی پێیان وابوو دەبێت شاندی پارتی لە هەولێرەوە بێتە بەغداد بۆ گفتوگۆ.

بۆچوونی دووەم: عەممار حەکیم، هادی عامری و نووری مالیکی پێیان وابوو دەبێت خودی عەلی زەیدی وەک سەرۆکوەزیرانی ڕاسپێردراو سەردانی هەولێر بکات، چونکە ئەمە بەشێکە لە ئەرکە دەستوورییەکانی بۆ پێکهێنانی کابینەکەی. لە کۆتاییدا بۆچوونی دووەم جێبەجێ کرا و سەردانەکە ئەنجامدرا.