سەرۆکی دەستەی ناوچە کوردستانییەکان هۆشداری دەدات لە پشتگوێخستنی دۆسیەی ناوچە جێناکۆکەکان لە کارنامەی حکومەتی نوێی عێراق و ناتەبایی لایەنە کوردییەکان بە هۆکاری سەرەکیی ئەم دۆخە دەزانێت.

نەبوونی ماددەی 140 لە کارنامەی حکومەت

فەهمی بورهان، سەرۆکی دەستەی ناوچە کوردستانییەکانی دەرەوەی ئیدارەی هەرێمی کوردستان بە کەناڵ8ـی ڕاگەیاند، کارنامەکەی عەلی زەیدی، سەرۆکوەزیرانی ڕاسپێردراو بۆ پێکهێنانی حکومەتی نوێی عێراق، لە 14 بەند پێکهاتووە. ئاماژەی بەوەش کرد کە لە هیچ کام لەو بەندانەدا بە شێوەیەکی ڕاستەوخۆ باسی مافەکانی گەلی کورد و دۆسیەی ناوچەکانی ماددەی 140 نەکراوە.

پێویستیی جێبەجێکردنی ماددە دەستوورییەکان

سەرۆکی دەستەی ناوچە کوردستانییەکان جەختدەکاتەوە کە هیچ جێگرەوەیەک بۆ ماددەی 140 نییە و دەبوایە لانیکەم لە بڕگەیەکدا وەک ئەولەویەت باسی ئەو ماددەیە بکرایە. ناوبراو ڕەخنەی لەوەش گرت کە تاوەکو ئێستا تەنانەت لیژنەی ماددەی 140 لەناو ئەنجوومەنی نوێنەرانی عێراقدا پێکنەهێنراوە، ئەمەش وەک ئاماژەیەک بۆ سستبوونی هەوڵەکان بۆ چارەسەری ئەو دۆسیەیە دەبینێت.

کاردانەوەی ناتەبایی کورد لەسەر بڕیارەکانی بەغداد

فەهمی بورهان ئاماژەی بەوە کرد کە ناتەبایی سیاسییەکانی کورد، پەرتەوازەیی و بەکارهێنانی گوتاری توند بەرانبەر یەکدی، هۆکارن بۆ ئەوەی بەغداد بەرنامە و شێوازی کارکردنی خۆی بەو جۆرە دابڕێژێت کە مەبەستیەتی. بە بڕوای ئەو، ئەم پەرتەوازەییە دەرفەتی بۆ حکومەتی فیدراڵ ڕەخساندووە تاوەکو بەبێ ڕەچاوکردنی تەواوەتی داواکارییەکانی کورد، هەنگاوەکانی بنێت.