بەڕێوەبەرایەتیی دارستان و پاوانی گەرمیان ئامادەکارییەکانی بۆ وەرزی هاوین و ئەگەری کەوتنەوەی ئاگر ڕاگەیاند و تەواوی پلان و داواکارییەکانی بۆ تەرخانکردنی بودجە ئاراستەی وەزارەتی کشتوکاڵ کردووە.

ئامادەکارییەکان و داواکاریی بۆ بودجە

ڕەشید بەکر، بەڕێوەبەری دارستان و پاوان لە سنووری ئیدارەی گەرمیان بە کەناڵ8ـی ڕاگەیاند، ئامادەکاری تەواویان بۆ ڕووبەڕووبوونەوەی ئەگەری ئاگرکەوتنەوە کردووە. بۆ ئەم مەبەستە کۆبوونەوەیان لەگەڵ دیوانی وەزارەتی کشتوکاڵ و سەرچاوەکانی ئاو ئەنجامداوە و سەرجەم پلان و داواکارییەکانیان پێشکەش کردوون تاوەکو بودجەی پێویستیان بۆ تەرخان بکرێت.

دابینکردنی ئامێرەکان بۆ شارەدێیەکان

بەڕێوەبەری دارستان و پاوان ئاماژەی بەوە کرد، لە ئێستادا 30 ئامێری پلاوەریان بۆ پاراستنی دارستانە دەستکردەکان لەبەردەستدایە. هەروەها ڕایگەیاند کە هەر بڕە ئامێرێک لە پێداویستییەکانیان زیاد بێت، دابەشی دەکەن بەسەر شارەدێیەکانی سنووری ئیدارەی گەرمیاندا بۆ ئەوەی لە کاتی پێویستدا بۆ ڕێگری لە تەشەنەکردنی ئاگر بەکاریبهێنرێن.