وەزیری وزەی ئیمارات ڕایدەگەیەنێت کشانەوەی وڵاتەکەی لە ڕێکخراوی ئۆپیک هیچ پاڵنەرێکی سیاسی لەپشت نییە و تەنیا لەپێناو بەرژەوەندیی نیشتمانی و زیادکردنی توانای بەرهەمهێنان بووە.

سروشتی بڕیاری کشانەوەکە

سوهەیل مەزروعی، وەزیری وزەی ئیمارات لە پلاتفۆڕمی ئێکس ڕایگەیاندووە، بڕیاری حکومەتی وڵاتەکەی بۆ کشانەوە لە ڕێکخراوی وڵاتانی هەناردەکاری نەوت (ئۆپیک) و هاوپەیمانیی ئۆپیک پڵەس، بڕیارێکی سەروەریی ستراتیجی بووە. ئاماژەی بەوەش کردووە، ئەم بڕیارە دوای پێداچوونەوەیەکی گشتگیر و ورد بۆ سیاسەتی بەرهەمهێنانی نیشتمانی و تواناکانی وڵات هاتووە و هیچ بەرژەوەندییەکی دەرەکی نەیجوڵاندوون.

بەرژەوەندیی نیشتمانی و سەقامگیری بازاڕ

وەزیری وزەی ئیمارات دەڵێت، بڕیارەکانی وڵاتەکەی تەنیا لەسەر بنچینەی ڕێنمایی بەرژەوەندییە نیشتمانییەکان، ڕۆڵی ئیمارات وەک دابینکەرێکی جێگەی متمانەی وزە و پابەندبوونیان بە سەقامگیریی بازاڕەکان دراوە. مەزروعی جەختی کردووەتەوە کە بڕیارەکانی ئیمارات سەروەرین و تەنیا بەرژەوەندیی نیشتمانی دەیانجووڵێنێت، نەک پێشبینی و لێکدانەوە دەرەکییەکان. هەروەها ئەو دەنگۆیانەشی ڕەتکردەوە کە باس لە بوونی ململانێی سیاسی یان لێکترازان لە نێوان ئیمارات و هاوبەشەکانی دەکەن.

مێژووی ئەندامێتی و هۆکاری جیابوونەوە

ڕێکخراوی ئۆپیک لە ساڵی 1960 دامەزراوە و عێراق یەکێکە لە ئەندامە دامەزرێنەرەکانی، ئیماراتیش لە ساڵی 1967ـەوە ئەندامی ئەو ڕێکخراوە بووە. هۆکاری سەرەکی کشانەوەی ئیمارات بۆ سنووردارکردنی ڕێژەی بەرهەمهێنان و ڕێگری لە زیادکردنی ئاستی بەرهەمهێنانی ئەو وڵاتە بۆ 5 ملیۆن بەرمیل نەوت لە ڕۆژێکدا دەگەڕێتەوە. لەسەر ئەو بنەمایەش، لە ڕۆژی 1ـی ئایاری ئەمساڵەوە ئیمارات بە فەرمی لە ئۆپیک و ئۆپیک پڵەس هاتووەتە دەرەوە.