وەزارەتى دارایى عێراق ڕەزامەندى لەسەر خەرجکردنى سەرمووچە و پلەبەرزکردنەوەى فەرمانبەرانى پەروەردە دەربڕى و بڕیاریش درا 150,000 فەرمانبەرى گرێبەست لە یاساى بودجەدا جێگیر بکرێن.

پلەبەرزکردنەوە بۆ فەرمانبەرانى پەروەردە

عەلا ناشی، ئەندامى ئەنجوومەنى نوێنەرانى عێراق ڕایگەیاند، ئەمڕۆ سەردانى فالح ساری، وەزیرى دارایى عێراقیان کردووە. لە دیدارەکەدا وەزیرى دارایى ڕەزامەندیى فەرمیى وەزارەتەکەى دەربڕیوە بۆ خەرجکردنى سەرمووچە و پێدانى پلەبەرزکردنەوە بە سەرجەم کارمەند و فەرمانبەرانى میلاکى وەزارەتى پەروەردە.

جێگیرکردنى 150 هەزار پلەى وەزیفى

سەبارەت بە چارەنووسى فەرمانبەرانى گرێبەست، عەلا ناشی ئاماژەى بەوە کرد کە وەزیرى دارایى ڕەزامەند بووە سەرجەم ئەو گرێبەستانەى فەرمانى دامەزراندنیان هەیە و ژمارەیان 150,000 پلەى وەزیفییە، پێکەوە لە ناو پڕۆژەیاساى بودجەدا جێگیر بکرێن. ئەم هەنگاوە بە مەبەستى بە فەرمیکردنى ڕاژەکانیان و گۆڕینیان بۆ فەرمانبەرى هەمیشەیى جێبەجێ دەکرێت.

شایستەى دارایی جووتیاران و خاوەن پڕۆژەکان

لە تەوەرێکى دیکەى کۆبوونەوەکەدا، پەرلەمانتارەکە ئاشکراى کرد کە وەزیرى دارایى عێراق ڕەزامەندیى نیشانداوە شایستە داراییەکانى جووتیاران و خاوەن پڕۆژەکان بە زووترین کات خەرج بکرێت. بڕیار دراوە ڕێکارەکان خێرا بکرێن تاوەکو مافە داراییەکان بۆ ئەو چینانە بگەڕێتەوە و چیتر لە وەرگرتنى شایستەکانیان دوا نەکەون.