بانکە ناوەندییەکان مەیلی کڕینی زێڕیان زیاد کردووە و پێشبینی دەکرێت تاوەکو کۆتایی ساڵی 2026، تێکڕای کڕینی مانگانەی ئەو کانزا زەردە بۆ دوو هێندە بەرز ببێتەوە.

پێشبینییەکان بۆ زیادبوونی کڕینی زێڕ

بەگوێرەی ڕاپۆرتێکی بانک و دامەزراوەی گۆڵدمان ساکس، بڕیارە تاوەکو کۆتایی ساڵی 2026 تێکڕای کڕینی زێڕ لەلایەن بانکە ناوەندییەکانەوە بگاتە 60 تۆن لە مانگێکدا. ئەمە لە کاتێکدایە کە پێشتر لە ساڵی 2025دا تێکڕای ئاستی کڕینی مانگانە تەنیا 29 تۆن بووە. لینا تۆماس و دان سترۆفێن، شرۆڤەکارانی گۆڵدمان ساکس، پێشبینی دەکەن کە زێڕ تاوەکو کۆتایی ئەمساڵ دەستبکاتەوە بە ڕەوتی بەرزبوونەوەی بەهاکەی.

کاریگەریی جەنگ و هەڵاوسان لەسەر بازاڕ

لەوەتەی سەرهەڵدانی جەنگی ئێران، زێڕ بە ڕێژەی 10%ی بەهاکەی لەدەستداوە و بەگشتی نرخەکەی دابەزیوە. هۆکاری ئەمەش بۆ بەرزبوونەوەی تێچووی وزە دەگەڕێتەوە کە بووەتە هۆی پەرەسەندنی فشارەکانی هەڵاوسان لەسەر ئاستی جیهان. ئەم بارودۆخە وایکردووە بانکە ناوەندییەکان کەمتر مەیلیان هەبێت بۆ سووککردنی سیاسەتی دراو و گۆڕانکاری لە نرخەکاندا.

ئامارەکانی ئەنجوومەنی جیهانیی زێڕ

گۆڵدمان ساکس لە هەڵسەنگاندنەکەیدا پشتی بە داتاکانی ئەنجوومەنی جیهانیی زێڕ بەستووە و ئاشکرای کردووە کە بانکە ناوەندییەکان لە چارەکی یەکەمی ئەمساڵدا، بە تێكڕا 244 تۆن زێڕیان کڕیوە. ئەم بڕە بەراورد بە چارەکی کۆتایی ساڵی ڕابردوو زیادیکردووە، کە لەو ماوەیەدا 208 تۆن زێڕ کڕابوو.