سبەى شەممە لە شارى بەغداد هەڵبژاردنەکانى دەستەیەکى نوێى فیدراسیۆنى تۆپى پیى عێراق بەڕێوەدەچێت، کە لەم هەڵبژاردنە سێ کەس بۆ سەرۆکایەتى هەڵبژاردنەکە خۆیان بەربژێر کردووە ئەوانیش عەدنان درجالى سەرۆکى ئێستاى فیدراسیۆنەکە و یونس مەحمودى جێگرى و ئەیاد بنیانە.

لەم هەڵبژاردنە ئەندامانى دەستەى گشتى مافى دەنگدانیان هەیە، کە ئەوانیش یانەکانى بەشدار لە خولى ئەستێرەکان و نایاب و نوێنەرى ناوبژیوانان و یاریزانە دێرینەکان و لقەکانى سەر بە فیدراسیۆنەکەیە، پێشبینى دەکرێت بەهێزترین کێبڕکێ لە پرۆسەکە ڕووبدات.

بە پێى دوایین هەواڵەکان لە بەغدادەوە، یونس مەحمود زۆرترین چانسى بردنەوەى بۆ پۆستى سەرۆکایەتى هەیە و بەشى زۆرى یانەکان و لقى شارەکانى فیدراسیۆنى تۆپى پێ دەنگ بە یونس دەدەن و دوێنێش عەدنان درجال ئاشکرایکرد کە دەستێوەردانى سیاسى هەیە بۆ گۆرینى ئاڕاستەى هەڵبژاردنەکان.