وەزارەتی گواستنەوەی عێراق پلانێکی سێ قۆناغی بۆ کاراکردنەوەی گواستنەوەی دەریایی ڕاگەیاند، کە ئامانجی کەمکردنەوەی جەنجاڵیی هاتووچۆ و گەشەپێدانی کەرتی گەشتوگوزارە لەو شارانەی دەکەونە سەر ڕووبارەکان.

قۆناغی یەکەم؛ جێبەجێکردنی پڕۆژەکە لە ئەنبار

مەیسەم سافی، بەڕێوەبەری نووسینگەی ڕاگەیاندنی وەزارەتی گواستنەوە ئاشکرای کرد، لە قۆناغی یەکەمدا پڕۆژەی تەکسیی ئاوی لە پارێزگای ئەنبار جێبەجێ دەکرێت. ئەم پڕۆژەیە بە هەماهەنگی لەگەڵ حکومەتی خۆجێی، قەزاکانی فەللوجە، ڕومادی، حەبانییە و هیت دەگرێتەوە، بە مەبەستی پێشکەشکردنی خزمەتگوزارییەکی مۆدێرن بۆ گواستنەوەی هاوڵاتییان.

قۆناغی دووەم؛ کاراکردنەوەی هێڵە ڕاوەستاوەکان

لە قۆناغی دووەمی پلانەکەدا، وەزارەتی گواستنەوە کار دەکات بۆ کاراکردنەوەی پڕۆژەی تەکسیی ئاوی لەو پارێزگایانەی کە پێشتر بەهۆی هۆکاری جۆراوجۆرەوە ڕاوەستابوون. ئەم پارێزگایانەش بریتین لە بەسڕە، واست، نەجەف و بابل، کە تێیاندا بنکە و هێڵەکانی گواستنەوەی ئاوی دووبارە نۆژەن دەکرێنەوە و دەخرێنەوە گەڕ.

قۆناغی سێیەم؛ لێکۆڵینەوە بۆ پارێزگاکانی دیکە

سەبارەت بە قۆناغی سێیەم، وەزارەت دەستی کردووە بە ئامادەکردنی لێکۆڵینەوەی ئابووری و تەکنیکی بۆ کارپێکردنی تەکسیی ئاوی لە پارێزگاکانی زیقار، نەینەوا و سەلاحەدین. ئامانج لەم قۆناغە گەشەپێدانی زیاتری ژێرخانی ئابووری و گەشتیاریی ئەو ناوچانەیە لە ڕێگەی بەکارهێنانی ڕێڕەوە ئاوییەکانەوە.

چارەسەری قەرەباڵغی و نۆژەنکردنەوەی بەلەمەکان

مەیسەم سافی ڕوونی کردەوە کە ئەم پڕۆژەیە یەکێکە لە چارەسەرە گرنگەکان بۆ کەمکردنەوەی جەنجاڵیی هاتووچۆ لە ناو شارە گەورەکاندا. هاوکات، دەبێتە شوێنێکی کات بەسەربردن بۆ خێزانەکان و گەشەپێدانی گەشتوگوزاری ناوخۆیی. بۆ ئەم مەبەستەش، هەڵمەتێکی بەرفراوان بۆ نۆژەنکردنەوەی ئەو بەلەمانە دەستیپێکردووە کە پێویستیان بە چاککردن هەیە تاوەکو بخرێنە خزمەت هێڵە نوێیەکانی گواستنەوەوە.