لە پێناو پاراستنی تەندروستیی گشتی و جێبەجێکردنی ڕێنماییەکان، ڕێکخراوە خێرخوازییەکان و هاونیشتمانییانی سلێمانی بۆ ئەنجامدانی قوربانییەکانیان ڕوو لە کوشتارگە هاوچەرخەکان دەکەن، بەرپرسانی کوشتارگەکانیش ئامادەیی تەواوی خۆیان بۆ ڕاییکردنی کارەکانیان نیشان دەدەن.

پابەندبوون بە مەرجە تەندروستییەکان

ڕێکخراوە خێرخوازییەکان و بەشێک لە هاونیشتمانییان لە کوشتارگەکان لەژێر چاودێریی مەرج و ڕێنماییە تەندروستییەکان ئاژەڵەکانیان سەردەبڕن و محەممەد محێدین، یەکێک لە سەرپەرشتیارەکانی کوشتارگەی هاوچەرخ لە سلێمانی، دڵنیایی دەداتە هاونیشتمانییان، کە ڕۆژانە لە کاتژمێر 8ـی بەیانییەوە کوشتارگەکە کراوەیە و دەتوانن قوربانییەکانیان لەوێ ئەنجامبدەن.

کات و ڕێکاری ڕادەستکردنەوەی قوربانییەکان

محەممەد محێدین ڕوونیشیدەکاتەوە، هەر هاونیشتمانییەک ئاژەڵەکەی ناوی لێدەنوسرێت؛ ئەگەر ئاژەڵەکە بچووک بێت پاش نیو کاتژمێر و ئەگەر ئاژەڵی گەورەش بێت، پاش کاتژمێرێک دەتوانێت وەریبگرێتەوە.

مەترسییەکانی گواستنەوەی نەخۆشی و گرنگیی کوشتارگەکان

ساڵانە لەگەڵ هاتنی جەژنی قوربان، لایەنە تەندروستییەکانی هەرێمی کوردستان هۆشداری دەدەن لە سەربڕینی ئاژەڵ لە شوێنە گشتییەکان و سەر شەقامەکان، ئەوەش لەپێناو ڕێگریکردن لە بڵاوبوونەوەی نەخۆشییە گوازراوەکان، بەتایبەت تای خوێنبەربوون. کوشتارگە هاوچەرخەکان بەهۆی هەبوونی پزیشکی ڤێتێرنەری و چاودێریی ورد، وەک تاکە شوێنی سەلامەت بۆ سەربڕینی ئاژەڵ دادەنرێن کە گەرەنتیی خاوێنی و تەندروستیی گۆشتەکە دەکەن.