وەزارەتی نەوتی عێراق ڕایگەیاند، بۆ پڕکردنەوەی پێداویستیی هاووڵاتییان و وەڵامدانەوەی ئەو خواستە زۆرەی لە ڕۆژانی جەژندا لەسەر سووتەمەنی دروست دەبێت، ئاستی بەرهەمهێنانی بەنزینیان بۆ 40 ملیۆن لیتر لە ڕۆژێکدا زیاد کردووە. ئەم هەنگاوە لە چوارچێوەی هەوڵەکانی وەزارەتەکەدایە بۆ کەمکردنەوەی پشتبەستن بە بەنزینی هاوردەکراو و گەیشتن بە ئاستی خۆبژێوی.

زیادکردنی بڕی بەرهەمهێنان

وەزارەتی نەوتی عێراق ڕایگەیاند، بەهۆی زیادبوونی خواست لەسەر بەکارهێنانی بەنزین لە ڕۆژانی جەژندا، ئاستی بەرهەمهێنانیان حەوت ملیۆن لیتر زیادکردووە و گەیاندوویانەتە 40 ملیۆن لیتر کە پێشتر 33 ملیۆن بووە.

پڕکردنەوەی خواست لە ڕۆژانی پشووی جەژن دا

حسێن تاڵب، بەڕێوەبەری گشتیی كۆمپانیای دابەشكردنی بەرهەمە نەوتییەكانی سەر بە وەزارەتی نەوتی عێراق بەمیدیاى فەرمیى عێراقى ڕاگەیاندووە، لە چوارچێوەی ئامادەکارییەکان بۆ ڕۆژانی جەژن و پڕکردنەوەی زیادبوونی خواست بۆ بەنزین، ئاستی بەرهەمهێنانیان لە 33 ملیۆن لیتر بۆ 40 ملیۆن لیتر لە ڕۆژێکدا زیادکردووە.

کەمکردنەوەی ئاستی هاوردەکردن

ئەوە لەکاتێکدایە زیاتر لە دوو ساڵە وەزارەتی نەوتی عێراق هەوڵدەدات لە بەرهەمهێنانی بەنزیندا بگاتە سفر هاوردە و ئاستی خۆبژێوی، بەڵام تاوەکو ئێستاش پشت بە هاوردەکردن دەبەستێت، بەجۆرێک بەگوێرەی دوایین داتای وەزارەتەکە، ڕۆژانە پێنج بۆ شەش ملیۆن لیتر بەنزین هاوردە دەکرێت، ئەمەش کەمترە بەراورد بە ساڵانی ڕابردوو کە ڕۆژانە زیاتر لە 15 ملیۆن لیتر هاوردە دەکرا.