پڕۆژەی ڕووناکی ڕێکارەکانی بۆ ڕاستکردنەوەی هەڵەی پسوولەکان دەستپێکردووە و ڕایدەگەیەنێت زیاتر لە 85%ی دانیشتووانی هەرێمی کوردستان لە کارەبای 24 کاتژمێری سوودمەند بوون.

گەڕاندنەوەی شایستە داراییەکان و ڕاستکردنەوەی پسوولەکان

وەزارەتی کارەبای حکومەتی هەرێمی کوردستان ڕایگەیاند، وەک بەشێک لە ڕێکارە بەردەوامەکانی ڕاستکردنەوەی پڕۆسەی پسوولەکردن، بڕی داشکاندنی 3 ملیار دینار بۆ هاوبەشانی ماڵان دەگەڕێنێتەوە. پڕۆژەی ڕووناکی ئاماژەی بەوە کردووە کە سیستەمی نوێی پسوولەکردن 118,000 هاوبەشی ماڵانی دیاریکردووە کە بەتەواوی لە داشکاندنی 3 مانگی یەکەمی پڕۆژەکە سوودمەند نەبوون، بۆیە بڕیاردرا ئەو مافە داراییەیان بۆ بگەڕێندرێتەوە.

میکانیزمی قەرەبووکردنەوە و ئاگادارکردنەوەی هاوبەشان

هەموو ئەو هاوبەشانەی ماڵان کە هەڵە لە پسوولەکانیاندا هەبووە، بڕی داشکاندنەکانیان لە پسوولەی مانگەکانی داهاتووی پڕۆژەی ڕووناکی یان لە قەرزی پێش پڕۆژەکە بۆ ئەژماردەکرێت و لە کۆی گشتی پارەکەیان کەمدەکرێتەوە. ئەو هاوبەشانەی لە پڕۆژەی ڕووناکی خۆیان تۆمارکردووە، لە ڕێگەی کورتەنامەی مۆبایلەوە بە وردی لە بڕی پارە و گۆڕانکارییەکان ئاگاداردەکرێنەوە.

ئامار و تێچووی گەڕێندراوە بۆ هەر خێزانێک

بەگوێرەی ئامارەکانی وەزارەتی کارەبا، کۆی گشتی ئەو پارەیەی بۆ هاوبەشانی ماڵان گەڕێندراوەتەوە زیاتر لە 3 ملیار دینارە. ژمارەی ئەو هاوبەشانەی کە لەم پاڵپشتییەی حکومەت سوودمەند دەبن گەیشتووەتە 118,000 هاوبەش، کە تێکڕای ئەو بڕە پارەیەی بۆ هەر ماڵێک دەگەڕێتەوە دەگاتە نزیکەی 25,000 دینار.

فراوانبوونی پڕۆژەی ڕووناکی و کەمبوونەوەی تێچووی کارەبا

تاوەکو ئێستا، نزیکەی 5.5 ملیۆن هاونیشتمانی کە دەکاتە زیاتر لە 85%ی دانیشتووانی کوردستان، کارەبای 24 کاتژمێرییان لە ڕێگەی پڕۆژەی ڕووناکی بۆ دابینکراوە. وەزارەتی کارەبا جەختی کردووەتەوە کە بەپێی نرخە نوێیەکان، 80%ی هاووڵاتیان، بەتایبەتی چینە کەمدەرامەتەکان، پارەیەکی کەمتر دەدەن بە بەراورد بەو بڕە پارەیەی پێشتر بۆ کارەبای مۆلیدە و کارەبای نیشتمانی خەرجیان دەکرد.