ئەندامێکی ئەنجوومەنی نوێنەران ئاماژە بەوە دەکات کە چارەنووسی تەواوکردنی کابینەی حکومەت بە ڕێککەوتنی لایەنە سیاسییەکانەوە بەستراوەتەوە و ئەگەری هەیە پێش دەستپێکردنی ڕێوڕەسمی عاشوورا دەنگ لەسەر وەزیرە ماوەکان بدرێت.

هەوڵەکان بۆ تەواوکردنی کابینەی حکومەت

دیلان غەفور، ئەندامى ئەنجوومەنى نوێنەرانى عێراق لە فراکسیۆنى یەکێتى بە کەناڵ 8ـى ڕاگەیاند، ئەگەر لایەنە سیاسییەکان لەم 1 بۆ 2 هەفتەیەدا ڕێکبکەون، دانیشتنێکى تایبەت بۆ دەنگدان لەسەر تەواوکردنى کابینەکەى عەلى زەیدى ئەنجام دەدرێت. ناوبراو ئاماژەى بەوە کرد کە پێویستە هێزە سیاسییەکان جموجۆڵەکانیان دەستپێبکەن بۆ یەکلاییکردنەوەى بەربژێرانى ئەو 9 وەزارەتەى کە تا ئێستا بە وەکالەت بەڕێوەدەبرێن.

کات و ئاستەنگەکانی بەردەم پەرلەمان

بە گوتەی ئەو پەرلەمانتارە، ئەنجوومەنى نوێنەران تاوەکو 1ـى تەمووزی 2026 لە پشووى وەرزى یاساداناندایە، بەڵام ئەگەر لایەنەکان تاوەکو 15ـى ئەم مانگە ڕێکنەکەون، ئەوا پڕۆسەی دەنگدانەکە دەکەوێتە دوای 1ـی تەمووز. هۆکاری ئەمەش بۆ دەستپێکردنی ڕێوڕەسمەکانی عاشوورا دەگەڕێتەوە کە تێیدا لایەنە شیعەکان سەرقاڵ دەبن و ناتوانرێت کۆبوونەوەی پەرلەمان ئەنجام بدرێت.

وەزارەتە بێ وەزیرەکان

لە ڕێکەوتی 14ـى ئایارى 2026، ئەنجوومەنى نوێنەرانى عێراق دەنگى لەسەر بەرنامەى کار و 14 وەزیرى کابینەکەى عەلى زەیدیدا. لە ئێستادا 9 وەزارەتى دیکە ماون کە دەنگیان پێ بدرێت، کە گرنگترینیان هەردوو وەزارەتى ناوخۆ و وەزارەتى بەرگرییە و یەکلاییکردنەوەیان پێویستی بە سازانی سیاسیی نێوان پێکهاتە جیاوازەکان هەیە.