سەرۆکوەزیرانی ئیسرائیل لە ڕێوڕەسمی دەستبەکاربوونی سەرۆکی نوێی مۆساد، هەڕەشەی تووندی ئاراستەی تاران کرد و ڕایگەیاند ڕێگە نادەن ئێران ببێتە خاوەنی چەکی ئەتۆمی.

ڕێوڕەسمی دەستبەکاربوون و هۆشدارییەکان بۆ تاران

بنیامین نەتانیاهوو، سەرۆکوەزیرانی ئیسرائیل لە وتارێکدا لە کاتی دەستبەکاربوونی ڕۆمان گۆفمان وەک سەرۆکی نوێی مۆساد، بەڵێنیدا کار بۆ لەناوبردنی دەسەڵاتی ئێران بکات. نووسینگەی سەرۆکوەزیران ڤیدیۆی ڕێوڕەسمەکەی بڵاوکردەوە کە تێیدا نەتانیاهوو جەخت دەکاتەوە کە چارەنووسی دەسەڵاتی ئێران لەناوچوونە و ئیسرائیلیش لەو پڕۆسەیەدا بەشدار دەبێت. نەتانیاهوو ئاماژەی بەوە کرد کە نایانەوێت چیدیکە ئێران بە بۆمبی ئەتۆمی و هەزاران مووشەکی بالیستیکی هەڕەشەیان لێ بکات.

ئەرکی نوێی مۆساد و ڕێگری لە چەکی ئەتۆمی

سەرۆکوەزیرانی ئیسرائیل ڕووی دەمی کردە ڕۆمان گۆفمان و ڕایگەیاند کە مۆساد پێشەنگ دەبێت لە خەباتکردن دژی دەستدرێژییەکانی ئێران و بەردەوام دەبێت لەو سیاسەتانەی ساڵانێکە پەیڕەوی لێکراوە. نەتانیاهوو دووپاتی کردەوە کە ڕێگە نادەن ئێران کاتژمێرەکە بگەڕێنێتەوە دواوە و چەکی ئەتۆمی بەدەستبهێنێت، هەروەها بە فەرمی بە سەرۆکی نوێی دەزگاکەی گوت کە "ئەمە ڕێنمایی منە و ئەرکی تۆیە کار بۆ لەناوبردنی دەسەڵات لە ئێران بکەیت".

گۆڕانکاری لە سەرۆکایەتیی دەزگای مۆساد

ڕۆمان گۆفمان لە لایەن نەتانیاهوووە بۆ ماوەی 5 ساڵ وەک بەڕێوەبەری نوێی مۆساد دەستنیشانکراوە و شوێنی داڤید باڕنییە دەگرێتەوە کە ئەویش بۆ ماوەی 5 ساڵ سەرۆکی دەزگاکە بوو. گۆفمان لە کۆتایی ساڵی 2025 وەک سەرۆکی نوێی ئەم دەزگا هەواڵگرییە دیاریکرا و لە ئێستادا بە فەرمی ئەرکەکانی وەرگرتووە.

ڕۆمان گۆفمان کێیە؟

ڕۆمان گۆفمان لە ساڵی 1976 لە بێلاڕووس لەدایکبووە و لە تەمەنی 14 ساڵیدا چووەتە ئیسرائیل. ناوبراو دەرچووی پەیمانگای سەربازیی دەریاییە و زانستە سیاسییەکانی لە زانکۆی ئەشکلون خوێندووە، هەروەها خاوەنی بڕوانامەی ماستەرە لە ئاسایشی نەتەوەییدا. گۆفمان لە ساڵی 1995 پەیوەندیی بە سوپای ئیسرائیلەوە کردووە و فەرماندەی ناوەندی نیشتمانیی مەشقی پیادە بووە. ناوبراو لە هێرشەکەی 7ـی ئۆکتۆبەردا بریندار بووە و لە ساڵی 2024ـەوە لە نووسینگەی سەرۆکوەزیران دەستبەکاربووە پێش ئەوەی پۆستی سەرۆکی مۆساد وەربگرێت.