قەیرانی کەمبوونی سوتەمەنی لە بەغدادی پایتەخت و چەند پارێزگایەکی دیکە بەردەوامە و ڕوانگەی ئیکۆ عێراقیش هۆکارەکەی بۆ دواکەوتنی هاوردەکردن و کێشەی کۆگاکردن دەگەڕێنێتەوە.

هۆکاری سەرەکیی قەیرانەکە

ڕوانگەی ئیکۆ عێراق لە نوێترین ڕاگەیێنراویدا ئاماژەی بەوە کردووە، دواکەوتنی پڕۆسەکانی هاوردەکردنی سوتەمەنی هۆکاری سەرەکیی ئەم قەیرانەیە کە ئێستا لە بەغداد و چەند پارێزگایەکی دیکە سەریهەڵداوە. بەپێی ڕاگەیێنراوەکە، ئەو کورتهێنانەی لە بازاڕەکاندا دروستبووە، پێشتر لە ڕێگەی هاوردەکردنەوە چارەسەر دەکرا.

ئامارەکانی بەرهەمهێنان و کورتهێنان

بەپێی داتاکانی ئیکۆ عێراق، وڵاتەکە ڕۆژانە نزیکەی 29 ملیۆن لیتر بەنزین لە پاڵاوگە جیاوازەکانەوە بەرهەمدەهێنێت، بەڵام ئاستی بەکاربردنی ڕۆژانە زیاتر لە 33 ملیۆن لیترە. لەو بڕە بەکارهاتووەش، نزیکەی 18%ـی بەنزینی موحەسەن و سوپەرە. ئەمەش بەو مانایەیە کە ڕۆژانە کورتهێنانێکی 4 بۆ 5 ملیۆن لیتری لە ناوخۆدا هەیە.

کێشەی کۆگاکردن و ئاستەنگەکانی بەرهەم

لە ڕاگەیێنراوەکەدا جەخت لەوە کراوەتەوە کە عێراق لە ئێستادا توانای نییە ئاستی بەرهەمهێنانی ناوخۆیی بەرز بکاتەوە. هۆکارەکەشی بۆ سنوورداریی توانای کۆگاکردنی بەرهەمە نەوتییە لاوەکییەکانی دیکە وەک "نەفتا" و "نەوتی ڕەش" دەگەڕێتەوە، کە لە کاتی بەرهەمهێنانی بەنزیندا دروست دەبن و لەبەر نەبوونی شوێنی کۆگاکردن ناتوانرێت ئاستی پاڵاوتن زیاتر بکرێت.