ئەو لیژنەیەى بە فەرمانى عەلى زەیدى فەرماندەى گشتیی هێزە چەکدارەکانى عێراق بۆ هێشتنەوەى چەک لە دەستى دەوڵەت پێکهێنرا، دەستى بەکارەکانى کرد کە نوێنەرى چەند وەزارەتێک و حەشدى شەعبى تێدایە.

بە دەنگەوەچوونی بانگەوازەی مەرجەعیەتی باڵا

سەباح نوعمان، گوتەبێژى فەرماندەى گشتیی هێزە چەکدارەکان،  لیژنەکە بە بڕیارێکى تەواو عێراقى پێکهێنراوە، بۆ وەڵامدانەوە و بەدەنگەوەچوونى بانگەوازى مەرجەعییەتى باڵا، جگەلەوەش بەشێکە لە کارنامەى وزارى و سیاسەتی حکومەت بۆ هێشتنەوەى چەک لە دەستى دەوڵەت و یەکخستنى گوتارى ئەمنى.

دانانی میکانیزم بۆ ڕادەستکردنی چەک و تەقەمەنییەکان

ڕوونیشیکردەوە، لیژنەکە میکانیزم دادەنێت بۆ تێکەڵکردن و پەیوەندی گرووپە دیاریکراوەکان، ڕادەستکردنى چەک و تەقەمەنی و سەربازگەکان بۆ لایەنى ئەمنیی عێراقى.

لە ماوەی دوو ڕۆژدا ئاماری تەواو دەدرێتە لیژنەی ناوەندی

بەگوتەى سەباح نوعمان، هەموو چەک و تەقەمەنییەکان ڕادەستى لیژنەى ناوەندى و لایەنە ئەمنییەکانى عێراق دەکرێت، لەماوەى دوو ڕۆژدا ئامارى تەواو دەدرێتە لیژنەى ناوەندى کە لەژێر چاودێری و بەدواداچوونى ڕاستەوخۆى فەرماندەى گشتیی هێزە چەکدارەکاندایە.

لایەنەکانی ناو لیژنەی ناوەندی

گوتەبێژى فەرماندەى گشتیی هێزە چەکدارەکان ئاشکراشیکرد، لیژنەى ناوەندی چەند لایەنێکى تێدایە، لەوانە وەزارەتەکانى بەرگرى و ناوخۆ، فەرماندەیی گشتیی ئۆپراسیۆنەکان و دەستەى حەشدى شەعبى، جگەلەوەش میکانیزم دادەنێت بۆ تەواوکردنى پرۆسەکە لەماوەیەکى پێوانەیدا و کاتێکى زۆر ناخایەنێت.

جەختیشیکردەوە، دەستەواژەى پچڕاندنى پەیوەندى، چوارچێوە کارگێڕییەکان و دووبارە پەیکەربەندى گرووپەکان لەناو دامەزراوە ئەمنییەکان لەخۆدەگرێت و تێکەڵکردنى چەکدارەکانیان لەگەڵ پێکهاتە سەربازییەکان گرەنتیی دەکرێت.