ئەمینداری گشتیی حیزبوڵا ڕایگەیاند، تاوەکو ئەو کاتەی گوندەکانمان بۆردوومان بکرێن و خەڵکەکەمان بکوژرێن، باکووری ئیسرائیل سەلامەت نابێت و داوای کشانەوەی سوپای ئیسرائیلیشی لە لوبنان کرد.

ڕووبەڕووبوونەوەی ئیسرائیل بەردەوام دەبێت

ئەمڕۆ نەعیم قاسم، ئەمینداری گشتیی حیزبوڵا لە راگەیێندراوێکدا باسی لە پرسی ئاگربەست لە لوبنان کرد و گوتی" تاوەکو ئەو کاتەی هێرشەکان بەردەوام بن، ئێمە بە هەموو توانامانەوە ڕووبەڕووی ئیسرائیل دەبینەوە".

ڕێگە بە سەلامەتی باکووری ئیسرائیل نادرێت

هەروەها ئاماژەی بەوەشکرد" تاوەکو ئەو کاتەی گوندەکانمان پارێزراونەبن، بۆردومان بکرێن و خەڵکەکەمان بکوژرێت، ئێمەش ڕێگە نادەین بە سەلامەتى باکووری ئیسرائیل".

داواکاری ئاگربەستی گشتگیر و کشانەوەی ئیسرائیل

قاسم، داوای "ئاگربەستی گشتگیر" و کشانەوەی هێزەکانى ئیسرائیلی لە لوبنان کرد و هانی دەسەڵاتدارانی لوبنانی دا، کۆتایی بە دانوستانە ڕاستەوخۆکانیان لەگەڵ ئیسرائیل بهێنن کە بە "شانۆگەری و سووکایەتی" وێنایکرد.

قاسم وتیشی: "دەبێت ئاگربەستەکە گشتگیر بێت، نابێت هیچ دابەشبوونێک لەنێوان باشوور و ناوچەکانی دیکەی لوبناندا هەبێت".

لێدوانەکانی قاسم، لە کاتێکدایە ئەمڕۆ جۆزێف عەون، سەرۆکی لوبنان ڕایگەیاند، ئەو ڕێککەوتنەی لە واشنتن دوای گفتوگۆکان لەگەڵ ئیسرائیل ڕاگەیێنرا، "دوا دەرفەت"ە بۆ گەیشتن بە ئاگربەستی گشتگیر.