بۆ جاری دووەم، شاری سلێمانی میوانداریی کۆڕبەندی نێودەوڵەتیی دێڵفی دەکات. کۆڕبەندەکە لە ماوەی 2 ڕۆژدا تیشک دەخاتە سەر چەندین تەوەر و پرسی گرنگی پەیوەست بە دۆخی ناوچەکە، ئابووریی هەرێمی کوردستان و ئەو ئاستەنگییانەی لە بەردەمیدان.

گفتوگۆ لەسەر ئاستەنگ و پێشهاتەکانی ناوچەکە

سبەی بۆ جاری دووەم کۆڕبەندی نێودەوڵەتیی دێڵفی لە سلێمانی بەڕێوەدەچێت و چەندین تەوەری گرنگ پەیوەست بە دۆخی ناوچەکە و بەرەوپێشچوون و ئاستەنگییەکانی بەردەم هەرێمی کوردستان گفتوگۆیان لەبارەوە دەکرێت.

پرسەکانی ناوچەکە و بەرەپێشچوونی ئابووریی هەرێمی کوردستان

سیمۆن سۆمۆکس، بەڕێوەبەری کۆڕبەندی نێودەوڵەتیی دێڵفی، لە کۆنفرانسێکی ڕۆژنامەوانیدا ڕایگەیاند، لە دوو ڕۆژی کۆڕبەندەکەدا لە سلێمانی ئەجێندایەکی پڕ لە دیدار و کۆبوونەوەیان دەبێت و پرسەکانی پەیوەست بە ناوچەکە و بەرەوپێشچوونی ئابووریی هەرێمی کوردستان و چەندین بواری دیکە لە پانێڵەکانی کۆڕبەندەکەدا دەخرێنەڕوو.

کۆڕبەندی ساڵانەی دێڵفی و بەشداریی هەرێمی کوردستان لە یۆنان

سیمۆن سۆمۆکس، بەڕێوەبەری کۆڕبەندی دێڵفی زیاتر ڕوونیکردەوە و لەوبارەیەوە دەڵێت: "کۆڕبەندی دێڵفی ساڵانە لە مانگی 4 لە شاری دێڵفیی یۆنان ڕێکدەخرێت، زۆر خۆشحاڵ بووین ئەمساڵ لە دێڵفی 3500 بەشداربوومان هەبوو، یەکێک لەوانەش قوباد تاڵەبانی بوو؛ توانیمان ژمارەیەک دیداری بۆ ڕێکبخەین لەگەڵ سەرکردەکانی ئەورووپا و چەندین وەبەرهێنەر، بۆیە بڕیارماندا بەردەوام بین و دووبارە کۆڕبەندەکە لە سلێمانیش ڕێکبخرێت".

بەڕێوەچوونی کۆڕبەندەکە لە شارە جیاوازەکان

بەڕێوەبەری کۆڕبەندی دێڵفی باسی ئەوەشی کرد: "ئەم کۆڕبەندە نێودەوڵەتییە تەنیا لە سلێمانی و دێڵفی بەڕێوەناچێت، بەڵکوو لە چەندین شاری دیکەش بەڕێوەدەچێت. لە دوو ڕۆژی کۆڕبەندەکەدا لە سلێمانی ئەجێندایەکی پڕ لە دیدار و کۆبوونەوەمان دەبێت و پرسەکانی پەیوەست بە ناوچەکە و بەرەوپێشچوونی ئابووریی هەرێمی کوردستان و چەندین بواری دیکە دەخرێنەڕوو".