عەباس عێراقچی، وەزیری دەرەوەی ئێران، باس لەو ساتە دەکات کە نووسینگەی ڕێبەری باڵای ئێران لەلایەن ئیسرائیل و ئەمریکاوە بۆردومان کرا و ئەو لەوێ ئامادە بووە. هاوکات تیشک دەخاتە سەر بەردەوامیی دانوستانەکان لەگەڵ واشنتن و هەڵوێستی وڵاتەکەی بەرامبەر جەنگی لوبنان و پاڵپشتیکردنی حیزبوڵا.

چۆنیەتیی ڕزگاربوون لە بۆردومانەکە

عەباس عێراقچی، وەزیری دەرەوەی ئێران لە دیدارێکیدا لەگەڵ کەناڵی مەیادین دا، باسی لەو ساتە کرد کە شوێنی عەلی خامنەیی، ڕێبەری پێشووی ئێران لەلایەن ئەمریکا و ئیسرائیلەوە بۆردومان کرا؛ گوتی، لەو ساتەدا ئەو لە ئۆفیسەکەی خامنەیی بووە، بەڵام لەبەر ئەوەی لە بەشێکی دیکەی باڵەخانەکە بووە، هێرشەکە کاریگەریی لەسەر ئەو بەشەی باڵەخانەکە نەبووە و بە سەلامەتی دەرچووە.

مەبەستی سەردانەکەی عێراقچی بۆ نووسینگەی خامنەیی

وەزیری دەرەوەی ئێران گوتی، ئەو لە ساتەوەختی تەقینەوەکەدا لە ئۆفیسەکەی خامنەیی بووە و بڕیار بووە بەرپرسێک ببینێت و کورتەیەکی دەربارەی دانوستانەکانی جنێڤ بۆ باس بکات.

گێڕانەوەی ساتەوەختی هێرشەکە

عەباس عێراقچی، وەزیری دەرەوەی ئێران زیاتر ڕوونی کردەوە و گوتی: "لە ساتەوەختی شەهیدبوونیدا من لە ئۆفیسی ڕێبەری باڵا بووم. وەک دەزانن، ڕۆژی پێنجشەممە لە جنێڤ دانوستانمان ئەنجام دا، ڕۆژی هەینی گەڕامەوە تاران و ئەو هێرشە کاتژمێر 9ی بەیانیی ڕۆژی شەممە ڕوویدا. من چووم بۆ ئۆفیسەکەی، بڕیار بوو لەوێ بەرپرسێک ببینم بۆ ئەوەی کورتەیەکی دەربارەی دانوستانەکانی جنێڤی بۆ باس بکەم. ئەوەی وای کرد من لە ژیاندا بمێنم، ئەوە بوو کە ئێمە لە بەشێکی دیکەی باڵەخانەکە بووین، بەڵام ئەو بەشەی دیکە کە ئەوی تێدا بوو وێران کرا."

پەیوەندییەکانی تاران و واشنتن

عەباس عێراقچی، وەزیری دەرەوەی ئێران لەبارەی پەیوەندیی تاران و واشنتن ڕایگەیاند، پەیوەندییەکانیان لەگەڵ ئەمریکا نەپچڕاوە و بەردەوامن، بەڵام لەم دواییانەدا دانوستانەکان پێشکەوتنێکی کەمیان بەدی هێناوە.

دۆخی لوبنان و پرسی ئاگربەست

لە دیدارێکدا لەگەڵ کەناڵی "مەیادین"ی لوبنانی، عێراقچی جەختی لەوە کردەوە کە هێرشەکانی ئیسرائیل بۆ سەر لوبنان دەبێت کۆتایییان بێت و تێگەیشتنی ئەوان بۆ ئاگربەست، کۆتاییهاتنی شەڕە لە سەرجەم بەرەکاندا.

پەیوەندیی نێوان ئێران، حیزبوڵا و دەوڵەتی لوبنان

وەزیری دەرەوەی ئێران ئاماژەی بەوەش کرد، پەیوەندیی ئەوان لەگەڵ حیزبوڵا لەسەر بنەمای پاڵپشتیکردنە و هەوڵ دەدەن پەیوەندییەکانیان لەگەڵ لوبنان وەک دەوڵەت لە هەموو بوارەکاندا فراوانتر بکەن.

مەرجەکانی ئێران بۆ پێشوەچوونی دانوستانەکان

عەباس عێراقچی، وەزیری دەرەوەی ئێران باسی ئەوەشی کرد: "پەیوەندییەکانمان لەگەڵ ئەمریکا نەپچڕاوە و بەردەوامە، بەڵام لە چەند ڕۆژی ڕابردوودا دانوستانەکان پێشکەوتنێکی کەمیان بەدی هێناوە. سەرەڕای ئەوەش هەردوولا کار لەسەر دەقەکان دەکەن و هەرکاتێک مەرجەکان گونجاو بوون، گفتوگۆکان لەسەر بنەمای بەرژەوەندییە نیشتمانییەکانی ئێران، مافەکانی گەلی ئێران و کۆتاییهێنان بە جەنگ لە ئێران و لوبنان دەبن و بەرەوپێشچوونی خێرا دەبینین."

کۆتاییهێنان بە هێرشەکان

وەزیری دەرەوەی ئێران ئاماژەی بەوەش کرد: "پێویستە هێرشەکانی سەر لوبنانیش کۆتایییان بێت، ئەمە هەڵوێستی ڕوونی ئێمەیە لەسەر ئاگربەست. پەیوەندیی ئێمە لەگەڵ حیزبوڵا لەسەر بنەمای پاڵپشتیکردنمانە و هەوڵ دەدەین پەیوەندییەکانیان لەگەڵ لوبنان وەک دەوڵەت لە هەموو بوارەکاندا فراوانتر بکەین."