بەردەوامیی گرژییە سەربازییەکانی نێوان تاران و واشنتن بازاڕی دراوە دیجیتاڵییەکانی هەژاندووە و بیتکۆین وەک بەهێزترین دراوی کریپتۆ، لە ماوەی یەک مانگدا 25%ـی بەهاکەی لەدەستداوە.

دابەزینی نرخی بیتکۆین و کاریگەریی مانگانە

نرخی یەک بیتکۆین لە جیهاندا بەڕێژەی 5% دابەزینی نوێی تۆمارکرد و گەیشتە 60,000 دۆلار. ئەم دابەزینە لەکاتێکدایە کە تەنیا لە ماوەی یەک مانگدا نرخی دراوەکە لە 68,000 دۆلارەوە بۆ ئاستی ئێستا دابەزیوە. بەپێی داتا داراییەکان، بەهای بیتکۆین لە ئێستادا 52.3% لە خوار بەرزترین ئاستی مێژوویی خۆیەوەیەتی کە لە تشرینی یەکەمی 2025 تۆماری کردبوو و گەیشتبووە 126,000 دۆلار.

زیانەکانی سێ مانگی جەنگ و هۆکارەکان

لە ماوەی سێ مانگی جەنگی نێوان واشنتن و تاراندا، یەک بیتکۆین 18,000 دۆلار لە نرخەکەی کەمبووەتەوە، بە جۆرێک لە 78,000 دۆلارەوە بۆ 60,000 دۆلار دابەزیوە. هۆکارە سەرەکییەکانی ئەم دابەزینە بۆ بەردەوامیی ئاڵۆزییەکان، پرسی داخستن یان سنووردارکردنی گەرووی هوورمز بەڕووی کەشتیوانیی جیهانی و بەردەوامیی گەمارۆ دەریاییەکان دەگەڕێتەوە، کە کاریگەریی ڕاستەوخۆیان لەسەر بازاڕەکان دروست کردووە.

مێژووی دراوەکە و پێگەی یاسایی لە ئەمریکا

دراوی بیتکۆین وەک دراوێکی ئەلیکترۆنی لە ساڵی 2009ـەوە لە ویلایەتە یەکگرتووەکانی ئەمریکا مامەڵەی پێوەدەکرێت. پشتیوانانی ئەم دراوە واژۆکردنی یاساکانی پەیوەست بەم دراوە لەلایەن سەرۆکی ئەمریکاوە بە قۆناغێکی گرنگ و مێژوویی لەقەڵەم دەدەن، کە ئامانج لێی جێگیرکردنی پێگەی بیتکۆینە لە داهاتووی ئابووریی جیهاندا، سەرەڕای ئەو هەڵبەز و دابەزە توندەی بەهۆی بارودۆخی سیاسییەوە ڕووبەڕووی دەبێتەوە.