بریکاری وەزارەتی سامانە سرووشتییەکان باس لە پلانێکی نوێ دەکات بۆ گۆڕینی سووتەمەنیی قورس بۆ گازی سروشتی لە کارگە پیشەسازییەکانی سلێمانی و ڕایدەگەیەنێت، ئەم هەنگاوە دەبێتە هۆی دابینکردنی کارەبای 24 کاتژمێری و پاراستنی ژینگە.

هەوڵەکان بۆ پشتبەستن بە گازی سروشتی

ئەحمەد موفتی، بریکاری وەزارەتی سامانە سرووشتییەکان لە پانێڵێکی کۆڕبەندی دێڵفی ڕایگەیاند، لە سلێمانی هەوڵێکی چڕ هەیە بۆ گۆڕینی سەرچاوەی وزە لە سووتەمەنیی قورسەوە بۆ گازی سروشتی. ئاشکرای کرد کە تەنها لەمساڵدا 8 گرێبەست لەگەڵ کۆمپانیا پیشەسازییەکان واژۆکراون بۆ ئەوەی گازی سروشتی وەک سەرچاوەی سەرەکیی وزە بەکاربهێنن و واز لە سووتەمەنییە قورسەکان بهێنرێت.

کاریگەریی گاز لەسەر کارەبا و ژینگە

بریکاری وەزارەتی سامانە سرووشتییەکان ئاماژەی بەوە کرد کە دابینکردنی کارەبای 24 کاتژمێری بە تەواوی پەیوەستە بە وەبەرهێنان لە کەرتی گازدا، چونکە گاز سەرچاوەیەکی پاکتر و کاراتری وزەیە. وتیشی، پشتبەستن بەم جۆرە وزەیە ڕێگری لە بڵاوبوونەوەی هەزاران مەتر سێجا کاربۆن دەکات، ئەمەش یارمەتیدەر دەبێت بۆ ڕووبەڕووبوونەوەی ئاڵنگارییەکانی گۆڕانی کەشوهەوا و گەشەپێدانی ئابووریی هەرێمی کوردستان.

پۆتانسێڵی وەبەرهێنانی گاز لە سلێمانی

ئەحمەد موفتی پێیوایە کە سلێمانی دەرفەتێکی گەورەی تێدایە و دەکرێت 50%ی وەبەرهێنانی گازی سروشتی لەو پارێزگایە بێت. بە بڕوای ئەو، گەشەپێدانی ئەم کەرتە دەبێتە هۆی زیادبوونی هەلی کار و بوژانەوەی زیاتری ئابووری، بەڵام جەختی لەوە کردەوە کە پێویستە لە داهاتوویەکی نزیکدا پڕۆژەیاسای نەوت و گاز پەسەند بکرێت بۆ ئەوەی پرۆسەکە بە یاسایی و بە شێوەیەکی ڕێکخراو بەڕێوەبچێت.