کاروان ستونی: هەموو حاجیانی کوردستان سەلامەتن و هیچ گرفتێکیان نییە
گوتەبێژی حەج و عومرەی هەرێمی کوردستان دڵنیایی دەداتە کەسوکاری حاجیان و ڕایدەگەیەنێت، بەهۆی داخستنی کایەی ئاسمانییەوە گەڕانەوەی ئەو حاجیانەی لە مەدینە ماونەتەوە تەنیا لە ڕێگەی وشکانییەوە دەبێت.
دۆخی تەندروستی و سەلامەتی حاجیانی هەرێم
کاروان ستونی، گوتەبێژی حەج و عومرەی هەرێمی کوردستان ڕایگەیاند، سەرجەم ئەو حاجیانەی کوردستان کە لە ئێستادا لە ناو خاکی سعودییەن، بەتایبەت ئەوانەی لە شاری مەدینەن، سەلامەتن و هیچ کێشە و گرفتێکیان نییە. ناوبراو ئاماژەی بەوە کرد کە ئەو حاجیانەشی پێشتر بە ڕێگەی ئاسمانی گەشتیان کردبوو، بەبێ هیچ گرفتێک گەیشتوونەتەوە ناو خاکی هەرێمی کوردستان.
گۆڕینی شێوازی گەڕانەوەی حاجیان بۆ ڕێگەی وشکانی
بەپێی ئامارەکانی بەڕێوەبەرایەتیی حەج و عومرە، تاوەکو ئێستا 3320 حاجی بە ڕێگەی ئاسمانی گەڕاونەتەوە. لە ئێستادا تەنیا 1800 حاجی لە شاری مەدینە ماونەتەوە و بڕیار دراوە سەرجەم ئەو حاجیانەی ماونەتەوە لە جیاتی گەشتی ئاسمانی، بە ڕێگەی وشکانی بەرەو هەرێمی کوردستان بگەڕێنەوە.
کاریگەریی داخستنی کایەی ئاسمانی لەسەر گەشتەکان
ئەم گۆڕانکارییە لە شێوازی گەڕانەوەی حاجیاندا دوای ئەوە هات کە بەهۆی هێرشەکانی ئێران بۆ سەر ئیسرائیل، کایەی ئاسمانیی عێراق بۆ ماوەی 72 کاتژمێر بە ڕووی هەموو گەشتەکاندا داخرا. بەهۆی ئەم بڕیارە نائاساییەوە، لەو ماوە دیاریکراوەدا هیچ فڕۆکەیەکی هەڵگری حاجیان ناتوانێت لە فڕۆکەخانەکانی عێراق و هەرێمی کوردستان بنیشێتەوە.
2 کاتژمێر پێش ئێستا