بازاڕی دراوە ئەلیکترۆنییەکان ڕووبەڕووی شۆکێکی گەورە بووەتەوە دوای ئەوەی کۆمپانیای "ستراتیجی ئاند"، کە گەورەترین خاوەنی بیتکۆینە لە جیهاندا، بەشێک لە داراییە دیجیتاڵییەکانی فرۆشت، ئەمەش بووەتە هۆی ناجێگیریی زیاتر لە نرخەکان و نیگەرانیی وەبەرهێنەران.

فرۆشتنی لەناکاوی بیتکۆین و شۆکی بازاڕ

بازرگانانی دراوە ئەلیکترۆنییەکان کە هەمیشە لەگەڵ گۆڕانکارییە خێراکان ڕاهاتوون، ئەمجارە بەهۆی هەنگاوێکی کۆمپانیای "ستراتیجی ئاند" (Strategy&) تووشی سەرسوڕمان بوون. ئەم کۆمپانیا ڕاوێژکارییە کە لە ئەمریکا، ئەوروپا، ئاسیا و ڕۆژهەڵاتی ناوەڕاست ئۆفیسی هەیە و هەمیشە هانی کڕینی بیتکۆینی داوە، بڕێک لە بیتکۆینەکانی بە بەهای 2,500,000 دۆلار فرۆشت، ئەمەش وایکرد نرخی ئەو دراوە زیاتر دابەزێت.

داڕمانی بەهای بیتکۆین و فشارە بەردەوامەکان

ئەم فرۆشتنە لە کاتێکدایە کە بیتکۆین لەژێر فشارێکی زۆردایە؛ لە سەرەتای ئەمساڵەوە نزیکەی 20%ـی بەهاکەی لەدەستداوە و بە بەراورد بە لوتکەی ساڵی ڕابردووش 40% دابەزیوە. ئەم دۆخە وایکردووە کۆمپانیاکانی وەبەرهێنان پێداچوونەوە بە پێشبینییەکانیان بکەن و گومان بکەن لەوەی ئایا بیتکۆین دەگەڕێتەوە لوتکە یان نزمبوونەوەی زیاتر بۆ ئاستی 40,000 دۆلار بەخۆیەوە دەبینێت.

ئەو کۆمپانیایانەی زۆرترین بڕی بیتکۆینیان لایە

کۆمپانیای ستراتیجی ئاند بە کۆنترۆڵکردنی 4%ـی کۆی بیتکۆینی جیهان، لە لوتکەی ئەو کۆمپانیایانەدایە کە زۆرترین دراوی ئەلیکترۆنییان کۆگاکردووە. قەبارەی بیتکۆین لای کۆمپانیا گەورەکان بەم شێوەیەیە:

ستراتیجی ئاند: 843,706 بیتکۆین

21 کاپیتاڵ: 43,514 بیتکۆین

مێتاپلانێت: 40,177 بیتکۆین

مارا هۆڵدینگ: 35,303 بیتکۆین

گەنجینەی ستانداردی بیتکۆین: 30,021 بیتکۆین

هۆکاری فرۆشتنی بیتکۆینەکان و قەیرانی نەختینەیی

مایکل سایلۆر، بەڕێوەبەری جێبەجێکاری کۆمپانیاکە، کە هەمیشە بیتکۆین بە "باشترین سەرمایەی جیهان" ناو دەبات، ناچار بووە پەنا بۆ فرۆشتنی بەشێک لە دراوەکان ببات. هۆکارەکەی بۆ قەیرانی بازاڕی سووتەمەنی و نەمانی پارەی نەختینەیی (کاش) دەگەڕێتەوە، کە وایکردووە قەرزێکی زۆر لەسەر کۆمپانیاکە کەڵەکە بێت. ئەم ڕووداوە ئەوەی سەلماند کە هێشتا جیهان بە تەواوەتی بۆ دابڕان لە سیستمی نەختینەیی و ڕووکردنە دونیای دیجیتاڵی ئامادە نییە.

ئاسۆی داهاتووی بازاڕی کریپتۆ

ئەگەرچی ئاڕاستەی جیهان بەرەو دیجیتاڵیکردن و ژیریی دەستکرد دەڕوات و بیتکۆینیش بەشێکە لەو ڕەوتە، بەڵام ئەمە بەو مانایە نییە کە نرخەکان بەردەوام لە بەرزبوونەوەدا بن. پسپۆڕان پێیان وایە بازاڕەکە هەمیشە قازانج و زیانی تێدایە و ئەوەی ئێستا ڕوودەدات جۆرێکە لە ڕێکخستنەوەی نرخەکان لەنێوان وەبەرهێنانی درێژخایەن و پێویستییە داراییە کاتییەکاندا.