دوای هێرشە مووشەکییەکەی ئێران بۆ سەر ئیسرائیل، ڕاوێژکاری باڵای ڕێبەری کۆماری ئیسلامی هۆشداری دەداتە ئەمریکا و ئیسرائیل و هەڕەشەی داخستنی ڕێڕەوە ئاوییە ستراتیژییەکانی ناوچەکە دەکات.

هەڕەشەی داخستنی ڕێڕەوە ئاوییە نێودەوڵەتییەکان

عەلی ئەکبەر ویلایەتی، ڕاوێژکاری ڕێبەری کۆماری ئیسلامیی ئێران بۆ کاروباری نێودەوڵەتی، ڕایگەیاند کە نابێت دوژمن تووشی لێکدانەوەی هەڵە بێت سەبارەت بە ئاسایشی گەرووی بابولمەندەب. ناوبراو جەختی کردەوە کە "ئەڵقەکانی بەرەی مقاوەمە" توانای ئەوەیان هەیە هەردوو ڕێڕەوە ئاوییە گرنگەکە، واتە گەرووی هورمز و گەرووی بابولمەندەب، بەڕووی هاتوچۆدا دابخەن.

وەڵامی مووشەکی و ناونانی هێرشەکە

بەرەبەیانی ڕۆژی دووشەممە 8ی حوزەیرانی 2026، ویلایەتی لە پەیامێکدا لە تۆڕی کۆمەڵایەتی ئێکس ئاماژەی بەوە کرد، کە وەڵامە مووشەکییەکەی ئێران لە جۆری "زاتولسەلاسل" بووە. ئەو باسی لەوە کرد کە ئەوەی ئیسرائیل لە بەیرووت ئەنجامی دەدات بە "گەمژەیی" و پێشێلکردنی ئاشکرای ئاگربەست ناوی برد، کە بووەتە هۆی خستنەگەڕی یەکەم ئەڵقە لە زنجیرە وەڵامەکانی ئێران.

هۆشداری بۆ ئەمریکا و ئیسرائیل

ڕاوێژکارەکەی ڕێبەری ئێران هۆشداریی توندی ئاراستەی واشنتن و تەلئەڤیڤ کرد و ڕایگەیاند، کە هەڵبژاردن لە دەست خۆیاندایە. ئاماژەی بەوەش کرد کە دەبێت یان کۆتایی بەو دۆخە بهێنن، یان ئەوەتا بچنە ناو هاوسەنگییەکی نوێی ڕێکخستنی هەردوو گەرووە ستراتیژییەکە کە مەبەستی لێی داخستنیانە.

هۆکارەکانی دەستپێکردنەوەی گرژییەکان

ئەم پەرەسەندنانە دوای ئەوە دێن کە شەوی یەکشەممە 7ی حوزەیرانی 2026، ئێران هێرشێکی مووشەکی کردە سەر ئیسرائیل. سوپای پاسدارانی ئێران هۆکاری هێرشەکەی بۆ پابەندنەبوونی ئیسرائیل و ئەمریکا بە ڕێککەوتنی ئاگربەست گەڕاندەوە، بەتایبەت بەردەوامبوونی بۆردوومانەکانی ئیسرائیل بۆ سەر لوبنان و ناوچەی زاحییەی بەیرووت.