بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە یان برێم، کونسوڵی فەرەنسا لە هەرێمی کوردستان کرد و دۆخی ناوخۆیی و ناوچەیی تاوتوێ کرد.

گفتوگۆ لەسەر پێشهاتەکان

لەو دیدارەدا کە تەرخانکرابوو بۆ تاوتوێکردنی گۆڕانکارییە ناوخۆیی و ناوچەییەکان، هەردوولا جەختیان لەسەر گرنگیی بەردەوامیی لێکتێگەیشتن و دیالۆگی نێوان لایەنە سیاسییەکان کردەوە بۆ ئەوەی دۆخەکە بە ئاراستەی سەقامگیری زیاتردا بڕوات.

پاراستنی سەقامگیریی عێراق

سەرۆکی یەکێتی دیدگای حزبەکەی لەبارەی پێشهاتەکان خستەڕوو و ڕایگەیاند: "هەموو هەوڵێکی یەکێتی بۆ دوورخستنەوەی وڵاتە لە گرژی و ململانێکان". بافڵ جەلال تاڵەبانی جەختی لەوەشکردەوە کە ئامانجی سەرەکییان ئەوەیە سەقامگیریی عێراق بە پارێزراوی بمێنێتەوە و لە هەر هەڕەشەیەک بەدوور بێت.