ئەنجوومەنی وەزیرانی هەرێمی کوردستان چوارەم کۆبوونەوەی خۆی لەمساڵدا ئەنجامدەدات و تێیدا دۆسیەی نەوت، داهاتی ناوخۆ و میکانیزمێکی نوێ بۆ هەماهەنگی لەگەڵ حکومەتی فیدراڵ دەخاتە سەر مێزی گفتوگۆ.

کارنامەی کۆبوونەوەکە و دۆسیە هەڵپەسێردراوەکان

کۆبوونەوەی ئەمڕۆی ئەنجوومەنی وەزیران کاتژمێر 10:00 لە هۆڵی مامۆستا سەعد لە شاری هەولێر بەڕێوەدەچێت. بەگوێرەی کارنامەی دانیشتنەکە، تەوەری سەرەکی گفتوگۆکردن دەبێت لەسەر داڕشتنی نەخشەڕێگایەک بۆ بەردەوامیدان بە دانوستانەکان لەگەڵ کابینەی وەزاریی نوێی حکومەتی فیدراڵ سەبارەت بە دۆسیە هەڵپەسێردراوەکان. هەروەها پێشنیارێک بۆ دروستکردنی "دەستەیەکی باڵای وەزاریی هەماهەنگی هەمیشەیی" لە نێوان هەولێر و بەغداد دەخرێتەڕوو، کە ئامانج لێی دابینکردنی میکانیزمێکی بەردەوامە بۆ بەدواداچوونی ڕێککەوتنەکان.

دۆسیەی نەوت و ئەنجامی کۆبوونەوەکان لەگەڵ عەلی زەیدی

لە بڕگەیەکی دیکەی کۆبوونەوەکەدا، دواین پەرەسەندنەکانی دۆسیەی نەوت تاوتوێ دەکرێن. بڕیارە دەرەنجامی دوا کۆبوونەوەی شاندی هەرێم و نوێنەری کۆمپانیا نەوتییەکان لەگەڵ عەلی زەیدی، سەرۆکوەزیرانی عێراق کە لە 3ی حوزەیران بەڕێوەچوو، بخرێتە بەردەم ئەنجوومەنی وەزیران بۆ بڕیاردان لەسەر هەنگاوەکانی داهاتوو.

داهاتی ناوخۆ و کاریگەرییەکانی سیستەمی ئەسیکۆدا

یەکێکی دیکە لە پرسە گرنگەکان، خستنەڕووی خشتەی داهاتە ناوخۆییەکانی هەرێمی کوردستانە. لەم تەوەرەدا باس لە کاریگەرییەکانی دۆخی ناوچەکە و یەکلایی نەکردنەوەی دۆسیەی "ئەسیکۆدا" دەکرێت، کە بووەتە هۆی کەمبوونەوەی بەرچاوی داهاتی گشتی و کاریگەری نەرێنی لەسەر دابینکردنی مووچە دروستکردووە. ئەم بابەتانە لەلایەن وەزیرانی دارایی، سامانە سروشتییەکان و ئەندامانی شاندی دانوستانکارەوە دەخرێنەڕوو.

ئاماری کۆبوونەوەکانی ئەنجوومەنی وەزیران

سەبارەت بە ڕێکخستنی کۆبوونەوەکان، داتاکان ئاماژە بەوە دەکەن کە ئەمە تەنیا چوارەم کۆبوونەوەی ئەنجوومەنی وەزیرانە لە پێنج مانگی ڕابردوودا. بەپێی پەیڕەوی ناوخۆ، دەبوو تاوەکو ئێستا 20 کۆبوونەوەی هەفتانە ئەنجام بدرایە، بەڵام تەنیا لە ڕێکەوتەکانی 14ی کانوونی دووەم، 11ی شوبات و 25ی شوبات کۆبوونەوە کراوە. ئەم سستییە لە ساڵی ڕابردووشدا هەبووە، کە تەنیا 26 کۆبوونەوە ئەنجامدراون لەکاتێکدا بەپێی یاسا دەبوو 47 کۆبوونەوەی ئاسایی بکرایە.