وەزیری کشتوکاڵی هەرێم ڕایدەگەیەنێت، کێشەی وەرگرتنی گەنمی جوتیاران بە سەردانی ساڵانە بۆ بەغداد چارەسەر نابێت و داوای هەماهەنگیی فراکسیۆنە کوردستانییەکان دەکات بۆ گۆڕینی بڕی شایستەی گەنم لە یاسای بودجەدا.

چارەسەری بنەڕەتیی کێشەی گەنم

بێگەرد تاڵەبانی، وەزیری کشتوکاڵ و سەرچاوەکانی ئاوی هەرێمی کوردستان ڕایگەیاند، تاوەکو بڕی شایستەی گەنمی جوتیاران لە یاسای بودجەی عێراقدا نەگۆڕدرێت، کێشەی وەرگرتنی گەنم لە جوتیارانی هەرێم بەردەوام دەبێت. ئاماژەی بەوەش کرد، گرفتی ئەوان بەوە چارەسەر نابێت هەموو ساڵێک بچنەوە بەغداد و بە بەڵگەوە باس لە "غەدرەکان" بکەن، بەڵکو چارەسەری ڕاستەقینە گۆڕینی بڕی شایستەکەیە لە ناو دەقە یاساییەکاندا.

ڕۆڵی فراکسیۆنە کوردستانییەکان

وەزیری کشتوکاڵ لە بەرنامەی (ڕاداری 8) جەختی لەوە کردەوە، بۆ ئەوەی بتوانن پشکی جوتیارانی هەرێم لە یاسای بودجەدا هەموار بکەنەوە، پێویستیان بە هەوڵ و هەماهەنگیی فراکسیۆنە کوردستانییەکان هەیە لە ئەنجوومەنی نوێنەرانی عێراق. ڕوونیکردەوە کە تەنیا بە فشار و کاری پەرلەمانی دەتوانرێت ئەو بڕە جێگیر بکرێت کە لەگەڵ قەبارەی بەرهەمی جوتیاراندا دەگونجێت.

سیاسەتی عێراق و بازاڕی ڕەش

بێگەرد تاڵەبانی ڕەخنەی لەو سیاسەتە گرت کە ئێستا حکومەتی فیدراڵ بەرامبەر هەرێمی کوردستان پەیڕەوی دەکات و گوتی، ئەم جۆرە مامەڵەیە تەنیا بۆ ئەوەیە بەرهەمی گەنمی هەرێمی کوردستان لە بازاڕی ڕەشدا بە نرخێکی کەم هەرزانفرۆش بکرێت. ئەمەش وەک فشارێک بۆ سەر کەرتی کشتوکاڵی هەرێم و زیانگەیاندن بە داهاتی جوتیاران لە قەڵەم دا.