سەرۆکایەتییەکانى عێراق، داوا دەکەن پەلە لە تەواوکردنى کابینەى حکومەت بکرێت، پاڵپشتیی خۆشیان بۆ پرەنسیپى کۆکردنەوەى چەک لە دەستى دەوڵەت دووپاتکردەوە.

کۆبوونەوەى سەرۆکایەتییەکانى عێراق لە کۆشکى بەغداد بە ئامادەبوونى نزار ئامێدى و عەلى زەیدى و هەیبەت حەلبووسى و فایەق زێدان بوو.

پەلەکردن لە تەواوکردنی کابینەی حکومەت

سەرۆکایەتییەکانى عێراق، جەختیانکردووەتەوە لە گرنگى پەلەکردن لە تەواوکردنى کابینەى حکومەت، تاوەکو ببێتە هۆى بەرزکردنەوەى ئاستى کارەکانى حکومەت و بەهێزکردنى تواناى دامەزراوەکان لە جێبەجێکردنى کارنامەى وزارى و بەدیهێنانى ئامانجەکانى.

دەکردنی یاسای پێویست و هەمواکردنەوەی یاساکانی وەبەرهێنان

هەروەها جەختیانکردەوە لە گرنگى دەرکردنى یاساى پێویست و هەموارکردنەوەى یاساکانى وەبەرهێنان، لەپێناو بەهێزکردنى کەرتەکە، تاوەکو ببێتە پاڵپشتییەک بۆ ڕۆڵى حکومەت و پەرەپێدانى دامەزراوەکانى دەوڵەت و بەهێزکردنى ڕێڕەوى گەشەپێدان و چاکسازى و بەدیهێنانى بەرژەوەندیى گشتى.

پشتیوانی لە کۆکردنەوەی چەک لە دەستی دەوڵەت

سەرۆکایەتییەکانى عێراق پشتیوانیی خۆیان بۆ پرەنسیپى کۆکردنەوەى چەک لە دەستى دەوڵەت دووپاتکردەوە، بە پایەیەک لە پایە سەرەکییەکانى سەروەریی یاسا و پتەوکردنى شکۆى دەوڵەت ناویانبرد، ستایشى ئەو هەڵوێست و هەنگاوانەیان کرد کە هەندێک لایەن ڕایانگەیاندووە و دەستپێشخەرییان کردووە بۆ پچڕاندنى پەیوەندییان لەگەڵ دەستەى حەشدى شەعبى.

دووپاتیشیانکردەوە، بڕیارى سیاسى و ئەمنى پێویستە تەنیا لە دەستى دەوڵەت و دامەزراوە دەستوورییەکان و لەژێر فەرمانى فەرماندەی گشتیی هێزە چەکدارەکان بێت.

جەختکردنەوە لە گرنگی ڕۆڵی دەسەڵاتی دادوەری

هاوکات جەختیانکردەوە، لە گرنگى ڕۆڵى دەسەڵاتى دادوەرى لە سەپاندنى یاسا و لێپرسینەوە لەگەڵ ئەوانەى دەستدرێژیی دەکەنە سەر ماڵى گشتى و دامەزراوەکانى دەوڵەت یاخود هەڕەشەلە ئاسایشى دەوڵەت دەکەن.

فرۆجۆرکردنی سەرچاوەکانی داهات

لەبوارى ئابوورى و دارایی، سەرۆکایەتییەکان بە پێویستیانزانى سەقامگیریی دارایی و پاڵپشتىی ئابووریی نیشتمانى بەهێز بکرێت و سەرچاوەکانى داهات فرەجۆر بکرێن و تەنیا پشت بە داهاتى نەوت نەبەسترێت، ئەوەش لە ڕێگەى پەرەپێدانى کەرتە بەرهەمدارەکان و پیشەسازى و کشتوکاڵ و گەشتیاریی و هاندانى وەبەرهێنانى ناوخۆیی و بیانى.

جەختکردنەوە لە هەڵوێستی جێگیریی عێراق

لەبارەى ڕەوشى هەرێمى و نێودەوڵەتى، سەرۆکایەتییەکان، دووپاتیان لە هەڵوێستى جێگیریی عێراق کردەوە کە داوا دەکات دەستبەجێ جەنگ ڕابگیرێت و کۆتایی بە هەموو جۆرە گرژى و پەرەسەندنێک لە ناوچەکەدا بهێنرێت و پەناببرێتە بەر دیالۆگ و دیپلۆماسی بۆ چارەسەرکردنى ناکۆکییەکان و یەکلاکردنەوەى ململانێکان.

هەروەها پاڵپشتیی عێراقیان دووپاتکردەوە بۆ هەموو هەوڵە بەگەڕخراوەکان بۆ پتەوکردنى ئاسایش و سەقامگیریی ناوچەکە و بەکارهێنانى خاکى عێراقیان بۆ هێرشکردنە سەر وڵاتان ڕەتکردەوە.