تورکیا هۆشدارییەکی توند ئاڕاستەی یۆنان و بەشە یۆنانییەکەی قوبرس دەکات؛ ئەنقەرە وەک وڵاتێکی گرەنتیکار جەخت لە پاراستنی هاووڵاتیانی تورک لە دوورگەکە دەکاتەوە و ئامادەیی سوپاکەی ڕادەگەیەنێت.

هۆشداریی وەزارەتی بەرگریی تورکیا

وەزارەتی بەرگریی تورکیا هۆشداریی داوەتە یۆنان و بەشە یۆنانییەکەی قوبرس و ڕایگەیاندووە، بە توندترین شێوە وەڵامی هەر هێرشێک دەدەنەوە، بکرێتە سەر بەشە تورکییەکەی قوبرس. زەکی ئاکتورک، گوتەبێژی وەزارەتی بەرگریی تورکیا لە کۆنفرانسێکی ڕۆژنامەوانی جەختی کردەوە، سوپای وڵاتەکەی توانای تەواوی هەیە وەڵامی هەر هەڕەشەیەک بداتەوە کە ئاسایشیی تورکەکانی قوبڕس بکاتە ئامانج.

زیادبوونی گرژییەکان لە ناوچەکەدا

ئەم لێدوانە توندەی تورکیا لە کاتێکدایە، ماوەی چەند ڕۆژێکە ئەنقەرە هەریەکە لە یۆنان و بەشە یۆنانییەکەی قوبرس بە پێشێلکردنی سەروەریی بەشە تورکییەکەی قوبرس تۆمەتبار دەکات. ئەم پرسە مێژووییە جارێکی دیکە گرژییەکانی نێوان هەردوولای گەیاندووەتە ئاستێکی بەرز.

شکستی هاوپەیمانییەتییە سەربازییەکان

گوتەبێژی وەزارەتی بەرگریی تورکیا، ئاماژەی بەوەکردووە، هەر هاوپەیمانییەتییەکی سەربازی کە هاوکێشە هەستیارەکانی ناوچەکە پشتگوێ بخات و ماف و بەرژەوەندییەکانی تورکیا و قوبرسی باکوور بەئامانج بگرێت، هیچ چانسی سەرکەوتنی نییە. ئاکتورک دووپاتی کردەوە کە تورکیا ڕێگە نادات ئەو جۆرە هاوپەیمانییەتییانە ئامانجەکانیان بپێکن.

ڕۆڵی تورکیا وەک وڵاتی گرەنتیکار

زەکی ئاکتورک، ڕایگەیاند، تورکیا وەک وڵاتی گرەنتیکار هاوشێوەی ڕابردوو بەردەوام دەبێت لە پاراستنی ماف و بەرژەوەندییەکانی کۆماری تورکیی قوبرسی باکوور. ناوبراو ئاماژەی بەوەش کرد، هێزە چەکدارەکانی تورکیا لە ئاستێکی بەرزی توانا و پێداگریدان بۆ ئەوەی بە توندترین شێوە وەڵامی هەر ڕەفتارێکی دوژمنکارانە بدەنەوە کە مەترسی بێت بۆ سەر ئاسایشی هاووڵاتیانی تورک لە قوبرس.