وەزیری هەرێم بۆ کاروباری پێکهاتەکان داوای بەهێزکردنی پێگەی سیاسیی کەمینەکان لە بەغداد دەکات و جەخت لەوە دەکاتەوە، دەبێت نوێنەرایەتیی ڕاستەقینەیان لە ناوەندە باڵاکانی بڕیاردا هەبێت.

نوێنەرایەتی لە پەرلەمان و حکومەتی فیدراڵی

ئایدن مەعرووف، وەزیری هەرێم بۆ کاروباری پێکهاتەکان، لە کۆنفرانسێکی ڕۆژنامەوانی ڕایگەیاند، زۆر گرنگە لە ناو ئەنجوومەنی نوێنەرانی عێراق نوێنەری پێکهاتەکان هەبێت. ناوبراو ئاماژەی بەوە کرد کە لەناو دەستووری عێراقدا تورکمان وەک سێیەم نەتەوە ناوی هێنراوە، هەر بۆیە پێویستە یەکێک لە جێگرەکانی سەرۆکوەزیرانی عێراق پشکی پێکهاتەکان بێت.

بەشداری لە کۆمیسیۆنی باڵای هەڵبژاردنەکان

وەزیری هەرێم بۆ کاروباری پێکهاتەکان داوای کرد، هاوشێوەی ئەزموونی هەرێمی کوردستان، پێکهاتەکان ئەندامیان لە ناو کۆمیسیۆنی باڵای سەربەخۆی هەڵبژاردنەکانی عێراقدا هەبێت. ئەم هەنگاوە بە مەبەستی زامنکردنی مافەکانیان و چاودێریکردنی پرۆسەی هەڵبژاردنەکان لە عێراق بە پێویست دەزانێت.

داواکاری بۆ دامەزراندنی وەزارەتێکی تایبەت

ئایدن مەعرووف، لە درێژەی داواکارییەکانیدا جەختی لەوەکردەوە، پێویستە وەزارەتێکی تایبەتمەند لەناو حکومەتی عێراقدا هەبێت کە تەنیا پەیوەست بێت بە ڕاییکردنی کاروباری پێکهاتەکان. بە گوتەی وەزیری هەرێم، هەبوونی وەزارەتێکی لەو شێوەیە دەبێتە هۆی باشتر گەیاندنی داواکاری و کێشەکانی پێکهاتەکان بە دەسەڵاتی جێبەجێکردن.