تەرخانکردنی 60 ملیار دۆلار بۆ وڵاتانی زیانلێکەوتووی جەنگ

بانکی جیهانی لە نوێترین ڕاپۆرتی خۆیدا ئاماژە بە خاوبوونەوەی گەشەی ئابووریی جیهان دەکات و پێشبینی دەکات ڕێژەی گەشە بۆ 2.5% دابەزێت، هاوکات بڕی 60 ملیار دۆلاریش بۆ پشتیوانیکردنی ئەو وڵاتانە تەرخان دەکات کە بەهۆی ململانێ سەربازییەکانەوە زیانیان بەرکەوتووە.

نزمترین ئاستی گەشە لە دوای کۆرۆنا

بانکی جیهانی لەو بارەیەوە ڕایگەیاند، لە نوێترین ڕاپۆرتی خۆیدا کە پێنجشەممە بڵاویکردەوە، چاوخشاندنەوەی بۆ پێشبینییەکانی گەشەی ئابووریی جیهان کردووە و نیشانەکانی خاوبوونەوەی تێدا بەدی دەکرێت، کە ئەمەش نزمترین ئاستی گەشەیە لە دوای قۆناغی پەتای کۆرۆناوە.

دابەزینی ڕێژەی گەشە و هەڵاوسان

بانکی جیهانی لە درێژەی ڕاپۆرتەکەیدا ئاماژەی بەوە کرد، پێشبینی دەکرێت گەشەی ئابووریی جیهانی لە 2.9%ـی ساڵی ڕابردووەوە بۆ 2.5% دابەزێت، لە کاتێکدا تێکڕای ڕێژەی هەڵاوسانی گشتی لە دەوروبەری 4% دەبێت.

کاریگەریی ئاڵۆزییەکانی ڕۆژهەڵاتی ناوەڕاست

بانکەکە لەبارەی کاریگەرییەکانیشەوە ئەوەی خستە ڕوو، بەردەوامیی ئاڵۆزی و نادڵنیاییە سیاسی و سەربازییەکانی ڕۆژهەڵاتی ناوەڕاست، دەکرێت وەکو هۆکارێکی گوشار کێشەی زیاتر بۆ بازاڕ و ئابووریی وڵاتانی جیهان دروست بکات و پێویستی بە چاودێریی ورد هەیە.

هاوکاریی دارایی بۆ وڵاتانی گەشەسەندوو

بانکی جیهانی لەبارەی وڵاتانی گەشەسەندووەوە ڕایگەیاند، قەیرانەکە سەختتر ڕووبەڕوویان بووەتەوە و دەستبەجێ بڕی تاوەکو 60 ملیار دۆلار بۆ ئەو وڵاتە گەشەسەندووانە دابین دەکات کە بە توندیترین شێوە بەهۆی جەنگی ئێرانەوە زیانیان پێگەیشتووە.

ئەو وڵاتانەی زۆرترین کاریگەرییان لەسەرە

بانکەکە لە ڕاپۆرتەکەیدا جەختی لەوە کردەوە، وڵاتانی ئاسیا خراپترین کاریگەریی ئابوورییان لەسەرە و هەندێک لەو وڵاتانەی کە زۆرترین دابەزینی گەشەی بەرهەمی ناوخۆیی بەخۆیانەوە دەبینن بریتین لە ئیمارات، سعوودیە، تورکیا و بەنگلادیش.

پێشبینیی نرخی نەوت بۆ ساڵی 2026

بانکی جیهانی لە کۆتاییی ڕاپۆرتەکەیدا ئەوەشی ڕاگەیاند، پێشبینی دەکات نرخی تێکڕای نەوتی خاوی برێنت لە ساڵی 2026ـدا 94 دۆلار بێت بۆ هەر بەرمیلێک.