دادگای تاوانەکانی کەرخ بە تۆمەتی زیانگەیاندن بە بەرژەوەندیی گشتی، حوکمی یەک ساڵ بەندکردنی بۆ خالید عەبدولواحید کوبیان، ڕاوێژکاری سەرۆکوەزیرانی پێشووی عێراق دەرکرد، بەڵام بەهۆی تەمەنییەوە جێبەجێکردنی سزاکەی بۆ ماوەی 3 ساڵ ڕاگرت.

سزادانی ڕاوێژکارەکەی سوودانی

دادگای تاوانەکانی کەرخ لەوبارەیەوە ڕایگەیاند، ڕاوێژکارێکی محەممەد شیاع سوودانی، سەرۆکوەزیرانی پێشووی عێراقی بە 1 ساڵ بەندکردن سزاداوە.

ماددەی یاسایی و جۆری تۆمەتەکە

دادگا لە ناوەڕۆکی بڕیارەکەیدا ئاماژەی بەوە کردووە، ئەو ڕاوێژکارەی سوودانی ناوی خالید عەبدولواحید کوبیانە، بەگوێرەی ماددەی 340 لە یاسای سزادان و بە تۆمەتی زیانگەیاندن بە بەرژەوەندیی ئەو شوێنەی کاری تێدا کردووە، بە بەندکردن بۆ ماوەی 1 ساڵ سزادراوە.

ڕاگرتنی جێبەجێکردنی سزاکە

دادگای ناوبراو لە ڕوونکردنەوەی زیاتردا لەو بارەیەوە گوتی، بەهۆی تەمەن و ڕەوشتی تاوانبارەوە، ئەو باوەڕەیان لادروست بووە کە جارێکی دیکە ناگەڕێتەوە بۆ تاوانێکی ئەنقەستی نوێ، بۆیە بڕیاریان داوە بە ڕاگرتنی جێبەجێکردنی سزاکە بۆ ماوەی 3 ساڵ.

داواکردنی قەرەبووی دارایی

دادگای تاوانەکانی کەرخ لە کۆتاییی بڕیارەکەیدا ئەوەشی ڕاگەیاند، مافی داوە بە سکاڵاکاری دۆسیەکە، سەردانی دادگا شارستانییەکان بکات بۆ داواکردنی قەرەبوو.