حکومەتی هەرێمی کوردستان کار بۆ تەواوکردنی مووچەی مانگی ئایاری خانەنشینان دەکات و هاوکات لەم هەفتەیەدا شایستە داراییەکانی هەزاران مامۆستا و فەرمانبەری گرێبەست رەوانەی بانکەکان دەکرێت.

دابەشکردنی نیوەی مووچەی خانەنشینانی دەڤەری دوو

بەرپرسێکی وەزارەتی دارایی هەرێمی کوردستان ڕایگەیاند، نیوەی مووچەی خانەنشینانی دەڤەری دوو دابەشکراوە. خانەنشینانی ئەم دەڤەرە مانگانە بڕی 3.8 ملیار دیناریان بۆ مووچە پێویستە، بەڵام بەهۆی کورتهێنان لە پارەی مووچەی مانگی ئایار، بەشێکیان تاوەکو ئێستا مووچەیان وەرنەگرتووە. بڕیارە لە ڕۆژانی یەکشەممە و دووشەممەی ئەم هەفتەیەدا، تەواوی ئەو خانەنشینانەی مووچەیان وەرنەگرتووە شایستە داراییەکانیان پێبدرێت.

چارەنووسی مووچەی مامۆستایان و فەرمانبەرانی گرێبەست

سەبارەت بە مووچەی مامۆستایان و فەرمانبەرانی گرێبەست و ئەو فەرمانبەرە هەمیشەییانەی لە پاش تەممووزی 2024 دامەزراون، بەرپرسەکەی وەزارەتی دارایی ئاشکرای کرد کە لەم هەفتەیەدا وەزارەت بڕیار لەسەر دابەشکردنی مووچەکانیان دەدات. ئاماژەی بەوەش کرد کە دابینکردنی مووچەکانیان مافێکی یاساییە و بەگوێرەی پارەی بەردەستی وەزارەت خەرج دەکرێت، پێشبینیش دەکرێت پڕۆسەی دابەشکردنەکە هەفتەیەک بخایەنێت.

ئامارەکانی مامۆستایانی گرێبەست و فەرمانبەران

بەپێی ئامارەکان، 37,933 مامۆستای گرێبەست لە وەزارەتی پەروەردە و 4,100 مامۆستای گرێبەست لە وەزارەتی خوێندنی باڵا هەن. جگە لەوانە، نزیکەی 25,000 فەرمانبەری دیکەی گرێبەست و هەمیشەیی هەن کە تاوەکو ئێستا مووچەی مانگی ئایاریان وەرنەگرتووە و چاوەڕێی بڕیاری وەزارەتی دارایی دەکەن.

داهاتی نانەوتی و مووچەخۆرانی هەرێم

بەرپرسێکی بانکی ناوەندیی هەرێم لقی سلێمانی دووپاتی کردەوە، کارە لەپێشینەکانیان تەرخانکردنی داهاتی نانەوتییە بۆ دابەشکردنی مووچەی مانگی ئایار. بەگوێرەی داتاکانی حکومەتی هەرێمی کوردستان، 51,000 مووچەخۆر لە هەرێم شایستە داراییەکانیان لەسەر داهاتی نانەوتی بۆ خەرج دەکرێت و مانگانە لەو سەرچاوەیەوە مووچەکانیان دابین دەکرێت.