دوای ماوەیەکی زۆر لە پەککەوتنی پرۆسەکە بەهۆی ڤیتۆی هەنگاریاوە، یەکێتیی ئەورووپا هەنگاوە فەرمییەکانی بۆ وەرگرتنی ئۆکرانیا و مەڵدۆڤا وەک ئەندامی نوێ دەستپێکردەوە؛ ئەم بڕیارە وەک وەڵامێکی ستراتیژی بۆ بارودۆخی جیهان و پاڵپشتیی کێیڤ لە جەنگی دژی ڕووسیا دەبینرێت.

هەڵگرتنی ڤیتۆی هەنگاریا

یەکێتیی ئەورووپا بە فەرمی دەستپێکردنەوەی گفتوگۆکانی تایبەت بە ئەندامبوونی ئۆکرانیای لە ڕیزەکانی ڕاگەیاند. ئەم هەنگاوە دوای ئەوە هات کە حکومەتی نوێی هەنگاریا ڕەزامەندی پیشاندا لەسەر هەڵگرتنی ئەو ڤیتۆیەی کە پێشتر سەرۆکوەزیرانی ئەو وڵاتە لەسەر پرۆسەکە دایبوو، بەوەش ڕێگرییە یاساییەکان لەبەردەم وڵاتانی ئەندام لادران.

هەڵبژاردەیەکی ستراتیژی بۆ ئەورووپا

ئەنتۆنیۆ کۆستا، سەرۆکی ئەنجوومەنی ئەورووپا و ئورسولا ڤۆن دێرلاین، سەرۆکی کۆمیسیۆنی ئەورووپا لە پۆستێکی هاوبەشدا ڕایانگەیاند، سەرجەم وڵاتانی ئەندام کۆکن لەسەر دەستپێکردنی دانوستانە سەرەتاییەکان بۆ بە ئەندامبوونی ئۆکرانیا و مەڵدۆڤا. بەرپرسانی باڵای ئەورووپا ئاماژەیان بەوە کردووە کە فراوانکردنی یەکێتییەکە هەڵبژاردەیەکی ستراتیژییە بۆ ڕووبەڕووبوونەوەی نادڵنیاییەکانی جیهان و پاراستنی بەرژەوەندییە هاوبەشەکان.

مێژووی پرۆسەکە و ئاستەنگەکان

دانوستانەکانی بە ئەندامبوونی ئۆکرانیا لە حوزەیرانی 2024 بە فەرمی دەستیپێکرد، بەڵام بەهۆی هەڵوێستەکانی ڤیکتۆر ئۆربان، سەرۆکوەزیرانی هەنگاریا کە بە نزیک لە ڕووسیا دەناسرێت، پرۆسەکە پەکیکەوتبوو. هەرچەندە ئەم هەنگاوە پاڵپشتییەکی گەورەیە بۆ ئۆکرانیا لە جەنگەکەی دژی ڕووسیا، بەڵام چاوەڕوان دەکرێت پرۆسەی تەواوبوونی ئەندامێتییەکە چەندین ساڵی دیکە بخایەنێت.