پارتی دیموکراتی کوردستان ڕایدەگەیەنێت، هەوڵەکان بۆ ڕزگارکردنی پڕۆسەی سیاسیی هەرێمی کوردستان لە چەقبەستن بەردەوامن و لیژنەیەکی باڵاش بۆ گفتوگۆ لەگەڵ لایەنەکان پێکهێنراوە؛ هاوکات جەخت لە چارەسەرکردنی کێشە داراییەکان لەگەڵ بەغدا و ڕاگرتنی هێرشە درۆنییەکان بۆ سەر هەرێمی کوردستان دەکرێتەوە.

بەردەوامیی هەوڵەکان بۆ چارەسەری چەقبەستوویی سیاسی

پارتی دیموکراتی کوردستان ڕایگەیاند، تاوەکو ئێستا دەستپێشخەرییەکەی مەسعود بارزانی و هەوڵەکان بەردەوامن بۆ ڕزگارکردنی پڕۆسەی سیاسیی هەرێمی کوردستان لەو چەقبەستنەی تێیکەوتووە؛ لەو چوارچێوەیەشدا لیژنەیەک لە ئاستی دەستەی کارگێڕیی مەکتەبی سیاسی، دەستی بە سەردان و پەیوەندیکردن لەگەڵ لایەنە سیاسییەکان کردووە بۆ گفتوگۆ و دۆزینەوەی چارەسەری پێویست بۆ کێشەکان.

گواستنەوەی کێشەکان بۆ سەر مێزی گفتوگۆ

کۆمیتەی ناوەندیی پارتی دیموکراتی کوردستان، دوای کۆبوونەوەی بە سەرۆکایەتیی مەسعود بارزانی، لە ڕاگەیێنراوێکدا ئاماژەی بەوە کردووە، "دەستپێشخەرییەکەی بارزانییان بەرز نرخاند، کە کێشەکانی لە ڕاگەیاندن و شەقامەوە گواستەوە بۆ سەر مێزی گفتوگۆ، هەروەها جەختیشی کردووەتەوە تاوەکو ئێستاش ئەم دەستپێشخەرییە و هەوڵەکان بەردەوامن، بەو هیوایەی هەموو لایەک بە لەبەرچاوگرتنی هەستیاریی بارودۆخەکە و گرنگیی ڕووداوەکان، بەرپرسیارانە بەرەو چارەسەری هەنگاو بنێن."

پەیوەندییەکانی نێوان هەرێمی کوردستان و بەغدا

لە بەشێکی دیکەی کۆبوونەوەکەی کۆمیتەی ناوەندیی پارتیدا باس لە پەیوەندییەکانی نێوان هەرێمی کوردستان و حکومەتی عێراق کراوە و دەڵێت: "هەرچەندە کێشەکان کەڵەکەکراون و کەمتر هەوڵی چارەسەرکردنیان دراوە، بەڵام پارتی ڕێگەی بەردەوامیی لە گفتوگۆ و دۆزینەوەی ڕێگەچارەی گرتووەتە بەر، بەتایبەتی لە بواری بودجە، شایستە و مووچەی فەرمانبەرانی هەرێمی کوردستان هەموو هەوڵێک دراوە بە سەردانیکردن و ڕەوانەکردنی شاند بۆ بەغدا بە ئامانجی چارەسەری و لادانی کۆسپ و ئاستەنگەکان."

پشتیوانیکردن لە حکومەتی فیدراڵ و مافە دەستوورییەکان

کۆمیتەی ناوەندیی پارتی لە ڕاگەیێنراوەکەدا، پشتیوانیی خۆی بۆ حکومەتەکەی عەلی زەیدی دووپات کردووەتەوە، بەو هیوایەی چیتر چارەسەری کێشەکان فەرامۆش نەکرێن و دەستوور وەک خۆی جێبەجێ بکرێت، هەروەها شایستە داراییەکانی هەرێمی کوردستان و مووچەی مووچەخۆران لە کاتی خۆیدا ڕەوانەی هەرێمی کوردستان بکرێت.

کاریگەرییەکانی جەنگ و هێرشە درۆنییەکان

تەوەرێکی دیکەی کۆبوونەوەکە تیشکخستنە سەر کاریگەرییەکانی جەنگی نێوان ئەمریکا و ئێران بووە لەسەر عێراق بەگشتی و هەرێمی کوردستان بەتایبەتی؛ کۆمیتەی ناوەندیی پارتی ئاماژەی بەوە داوە: "وێڕای ئەوەی هەرێمی کوردستان بەشێک نەبووە لەو شەڕە، بەڵام بەداخەوە تاوەکو ئێستاش کە شەڕ ڕاگیراوە، هێرشی هاژەک و درۆن بۆ سەر هەرێمی کوردستان ڕانەگیراوە و زیانێکی زۆری هەبووە، دەیان بریندار و شەهید بە ناحەق لە ئاکامی ئەو هێرشانە بوونەتە قوربانی، ئەوە جگە لەوەی زیانێکی مادیی زۆری هەبووە و جووڵەی بازرگانییان سست کردووە."