محەممەد شیاع سوودانی، سەرۆکی هاوپەیمانیی ئاوەدانکردنەوە و گەشەپێدان، لەگەڵ قەیس خەزعەلی، ئەمینداری گشتیی بزووتنەوەی عەسائیبی ئەهلی هەق کۆبووەوە. لە کۆبوونەوەکەدا، هەردوولا ڕەوشی سیاسیی عێراق و ناوچەکەیان تاوتوێ کرد و جەختیان لەسەر پێویستیی یەکخستنی گوتاری نیشتمانی و تەواوکردنی شایستە دەستوورییەکانی کابینەی حکوومەتی نوێ کردەوە.

تەوەرە سەرەکییەکانی کۆبوونەوەکە

محەممەد شیاع سوودانی، سەرۆکی هاوپەیمانیی ئاوەدانکردنەوە و گەشەپێدان لەگەڵ قەیس خەزعەلی، ئەمینداری گشتیی بزووتنەوەی عەسائیبی ئەهلی هەق کۆبووەوە و جەختیان لەسەر پێویستیی پاراستنی یەکڕیزیی چوارچێوەی هەماهەنگی کردەوە.

ڕەوشی سیاسیی عێراق و ناوچەکە

نووسینگەی ڕۆژنامەوانیی سەرۆکی هاوپەیمانیی ئاوەدانکردنەوە و گەشەپێدان ڕاگەیێنراوێکی لەبارەی کۆبوونەوەکە بڵاو کردەوە و تێیدا ئاماژە بەوە کراوە، لە کۆبوونەوەکەدا محەمەد شیاع سوودانی و قەیس خەزعەلی تاوتوێی ڕەوشی سیاسیی ناوخۆی عێراق و دۆخی ناوچەکەیان کرد.

تەواوکردنی کابینەی حکوومەتی نوێ

بەگوێرەی ڕاگەیێنراوەکە، هەردوولا جەختیان لەسەر گرنگیی ڕێککەوتنی لایەنە سیاسییەکان کردەوە بۆ تەواوکردنی کابینەی حکوومەتی نوێی عێراق و جێبەجێکردنی ئەم شایستە دەستوورییە بە شێوازێک بێت کە سەقامگیریی کاری حکوومەت بەهێز بکات و پاڵپشتیی ڕەوتی پرۆسەی سیاسی بکات.

پاڵپشتیکردنی خزمەتگوزارییەکان و بەرنامەی حکوومەت

لە ڕاگەیێنراوەکەدا ئاماژە بەوە کراوە، هەردوولا جەختیان لەسەر پاراستنی یەکڕیزیی چوارچێوەی هەماهەنگی، یەکخستنی گوتاری نیشتمانی و پشتیوانیکردنی حکوومەت لە هەردوو ئاستی جێبەجێکردن و یاساداناندا کردەوە، بەجۆرێک کە بەردەوامبوون لە پێشکەشکردنی خزمەتگوزاری بە هاوڵاتییان و جێبەجێکردنی پڕۆژەکان بەگوێرەی ئامانجەکانی ئاوەدانکردنەوە و گەشەپێدان کە لە بەرنامەی حکوومەتدا دیاری کراوە، مسۆگەر بکات.