گرووپی شانۆی هەوار، سەر بە شانۆی نەتەوەیی کورد، توانی چوار خەڵاتی سەرەکیی فێستیڤاڵی نێودەوڵەتیی شەوانی ئوفیری شانۆی دیۆدراما لە شاری عومان بەدەست بهێنێت.

نوێنەری هەرێمی کوردستان و عێراق بوون

گرووپەکە بە نوێنەرایەتیی هەرێمی کوردستان و عێراق، بە بەرهەمی دیۆدرامای "سەلمە" لە فێستیڤاڵەکەدا بەشداری کرد؛ کە لە شاری سەڵاڵەی عومان بەڕێوە چوو و زیاتر لە 63 نمایش لە جیهانی عەرەبی و وڵاتانی جیاواز پێشکەش کران.

باس لە ئەنفال دەکات

دیۆدرامای "سەلمە" کە باس لە ئازارەکانی ئەنفال، کیمیابارانکردنی هەڵەبجە و کۆچی زۆرەملێی خەڵکی کوردستان و عێراق دەکات، توانی لە کۆی شەش خەڵاتی سەرەکی فێستیڤاڵەکە، چوار خەڵات بباتەوە.

خەڵاتەکان بریتی بوون لە:

          •       خەڵاتی باشترین نمایشی تەواو

          •       خەڵاتی باشترین دەرهێنەر بۆ نەژاد نەجم

          •       خەڵاتی باشترین ئەکتەری کچ بۆ هەوار فارس و ئۆغێرلی ئەمپێرتی فەڕەنسی

ڕێز لە هەڵکەوت عەزیز گیرا

گرووپی شانۆی هەوار، لە هەنگاوێکی مرۆڤانەدا نمایشی "سەلمە"ی پێشکەش بە ڕۆحی هونەرمەند و ڕۆژنامەوانی کورد، هەڵکەوت عەزیز کرد، ئەندامانی گرووپ و ئامادەبووان خولەکێک بێدەنگییان بۆ ڕێزلێنان لە یادی کۆچکردوو ڕاگرت.

دەستەی شانۆییەکە کێن؟

ئەم بەرهەمە بە پاڵپشتی فیدراسیۆنی جیهانی کورد ئەنجامدراوە و دەستەی کارەکە پێکدێت لە د. دڵشاد مستەفا وەک نووسەر، نەژاد نەجم وەک دەرهێنەر و سینۆگراف، هەوار فارس و ئۆغێرلی ئەمپێرت وەک ئەکتەر، دکتۆر منتهی طارق وەک بەڕێوەبەری گرووپ، بەرهەم یاسین وەک یاریدەدەری دەرهێنەر و عەلی ئاراس وەک بەڕێوەبەری بەرهەم و ڕاگەیاندن.

بردنەوەی ئەم چوار خەڵاتە لە یەکێک لە گرنگترین فێستیڤاڵە نێودەوڵەتییەکانی شانۆ، بە سەرکەوتنێکی گەورە بۆ شانۆی کوردی و عێراقی دادەنرێت و دووبارە توانای هونەرمەندانی کورد لە ئاستی نێودەوڵەتی دەسەلمێنێتەوە.