ڕاگەیاندنی هەواڵی ڕێککەوتنی نێوان واشنتن و تاران بازاڕە جیهانییەکانی هەژاند و نرخی یەک ئۆنسە زێڕ لە ماوەی یەک ڕۆژدا زیاتر لە 100 دۆلار بەرزبووەوە.

هەڵکشانی خێرای نرخی زێڕ

ئەمڕۆ دووشەممە، نرخی یەک ئۆنسە زێڕ لە بازاڕە جیهانییەکاندا بەهۆی بڵاوبوونەوەی هەواڵی ڕێککەوتنی ئەمریکا و ئێران، زیاتر لە 2.5% بەرزبووەوە. نرخی زێڕ کە ڕۆژی هەینی بە 4213 دۆلار داخرابوو، بەیانی ئەمڕۆ بە جیاوازی 50 دۆلار کرایەوە و لە ئێستاشدا لە دەوروبەری 4330 دۆلار مامەڵەی پێوەدەکرێت، کە ئەمە بەرزترین ئاستە لە ماوەی هەفتەی ڕابردوودا. هەروەها نرخی زێڕ بۆ ڕادەستکردنی لە مانگی 8 بۆ 4344 دۆلار بەرزبووەتەوە.

کاتی واژۆکردنی ڕێککەوتنەکە

شەهباز شەریف، سەرۆکوەزیرانی پاکستان، لە هەژماری فەرمی خۆی لە پلاتفۆرمی X ڕایگەیاند، ڕێککەوتنی نێوان هەردوو وڵات گەیشتووەتە قۆناغی کۆتایی و بڕیارە ڕۆژی هەینی بە شێوەیەکی فەرمی لە وڵاتی سویسرا واژۆ بکرێت.

کاردانەوەی نرخەکانی نەوت و دۆلار

هاوکات لەگەڵ بەرزبوونەوەی نرخی زێڕ، نرخی نەوت لە بازاڕەکاندا بە ڕێژەی 4% دابەزیوە. بەهای دۆلاری ئەمریکیش بۆ نزمترین ئاستی خۆی لە ماوەی 10 ڕۆژی ڕابردوودا دابەزی، ئەمەش هۆکارێکی دیکە بوو بۆ زیاتر بەرزبوونەوەی نرخی زێڕ. پێشتر و لە کۆتایی مانگی شوباتەوە، بەهۆی دەسپێکی جەنگی ئەمریکا و ئیسرائیل دژی ئێران، نرخی زێڕ نزیکەی 20%ـی بەهاکەی لەدەستدابوو.

گۆڕانکاری لە پێشبینییەکانی سوودی بانکی

دوای بڵاوبوونەوەی هەواڵی ڕێککەوتنەکە، پێشبینییەکانی بازاڕ بۆ بەرزکردنەوەی ڕێژەی سوودی بانکی لە ئەمریکا لە 69%ـەوە بۆ 48% دابەزیوە. لە ئێستاشدا وەبەرهێنەران چاوەڕێی بڕیارەکانی بانکی ناوەندی ئەمریکا دەکەن کە بڕیارە ڕۆژی چوارشەممە بە سەرپەرشتی کێڤن وارش، سەرۆکی نوێی بانکەکە ڕابگەیەنرێت؛ پێشبینییە سەرەتاییەکان ئاماژە بەوە دەکەن کە ڕێژەی سوود بەبێ گۆڕانکاری دەمێنێتەوە.