بەشێک لە نیشتەجێبوانی گوندی شاوێس دژی بردنی زەوییەکانیان و شێوازی قەرەبووکردنەوەیان گردبوونەوە؛ ئەوان داوای دەستوەردانی بەپەلەی سەرۆکی حکومەت دەکەن بۆ ڕاگرتنی ئەو ستەمەی دەرحەقیان دەکرێت.

ناڕەزایەتی دژی ئیفرازکردنی زەوییەکان

دانیشتووانی گوندی شاوێس لە گردبوونەوەیەکی ناڕەزایەتیدا ڕایانگەیاند، کە لە پرۆسەی ئیفرازکردنی زەوییەکاندا رووبەری 900 دۆنم زەوینیان لێ براوە. نوێنەری دانیشتووانی گوندەکە لە کۆنفرانسێکی ڕۆژنامەوانیدا ئاماژەی بەوە کرد، لایەنە پەیوەندیدارەکان زەوییەکانیان بردوون و پێیان ڕاگەیاندوون کە لە شوێنی دیکە قەرەبوو دەکرێنەوە، بەڵام ئەوان ئەم شێوازە ڕەت دەکەنەوە.

جیاوازییەکی زۆر لە بەهای قەرەبووەکان

یەکێک لە هۆکارە سەرەکییەکانی ناڕەزایەتییەکە بۆ جیاوازیی نرخی زەوییەکان دەگەڕێتەوە. نوێنەری گوندەکە ڕایگەیاند، بەهای هەر پارچە زەوییەکی ئەوان لە نێوان 10 بۆ 12 دەفتەر دۆلاردایە، بەڵام ئەو شوێنەی بۆ قەرەبووکردنەوەیان دیاریکراوە، نرخی زەوییەکانی تەنیا 60 وەرەقەیە، هەر بۆیە ئامادە نین ئەو قەرەبووە وەربگرن و بە نادادپەروەری دەزانن.

داواکاری بۆ دەستوەردانی سەرۆکی حکومەت

دانیشتووانی گوندەکە دەڵێن "لەوەتەی هەیە ستەم لە خەڵکی شاوێس دەکرێت"، بەو هۆیەشەوە داوا لە سەرۆکی حکومەتی هەرێمی کوردستان دەکەن بە شێوەیەکی مەیدانی بێتە سەر هێڵ بۆ چارەسەرکردنی کێشەکەیان. ئەوان جەخت دەکەنەوە کە چیتر قبوڵی ناکەن زەوییەکانیان بەو شێوەیە لێ بکرێت و داوای مافی دارایی و یاسایی خۆیان دەکەن.