دامەزراوەی سەرۆک جەلال تاڵەبانی چالاکییەکانی بۆ بەغداد دەگوازێتەوە و نووسینگەیەکی نوێ دەکاتەوە؛ ئامانجەکە زیندوو هێشتنەوەی فیکر و ڕێبازی مام جەلالە لە تەواوی عێراقدا.

کردنەوەی نووسینگەی بەغداد

پێشنیوەڕۆی ئەمڕۆ، دامەزراوەی سەرۆک جەلال تاڵەبانی کە دامەزراوەیەکی ڕۆشنبیرییە، بە فەرمی نووسینگەی خۆی لە شاری بەغدادی پایتەخت کردەوە. ئەم هەنگاوە بە مەبەستی پەرەپێدانی چالاکییە ڕۆشنبیرییەکان و درێژەدان بەو ڕێبازە سیاسییە دێت کە سەرۆک جەلال تاڵەبانی لە پایتەختی عێراق پەیڕەوی دەکرد.

کۆکبوونی عێراقییەکان لەسەر مام جەلال

محەمەد سابیر، سەرۆکی دامەزراوەی سەرۆک جەلال تاڵەبانی لە لێدوانێکدا بۆ کەناڵ8 ڕایگەیاند، مام جەلال تاکە سیاسی بووە کە هەموو عێراقییەکان بە بێ جیاوازی لەسەر کەسایەتییەکەی کۆک بوون. ئاماژەی بەوەش کرد، بەغداد شوێنی بەشێکی زۆری ژیان و تێکۆشانی مام جەلال بووە، هەر بۆیە ناکرێت دامەزراوەکە لەم شارەدا چالاکیی نەبێت.

پلان بۆ تەواوی پارێزگاکانی عێراق

سەرۆکی دامەزراوەکە ئاشکرای کرد، کە یەکەم کۆڕبەندی دامەزراوەکەیان لە شاری نەجەف ئەنجامدراوە و بڕیارە کۆڕبەندی دووەمیش لە زانکۆی بەسرە بەڕێوە بچێت. محەمەد سابیر جەختی لەوە کردەوە کە پلانیان هەیە لە تەواوی پارێزگاکانی عێراق نووسینگە بکەنەوە تاوەکو لەو ڕێگەیەوە فیکر و ڕێبازی سەرۆک جەلال تاڵەبانی لە سەرانسەری وڵاتدا بە زیندوویی بهێڵنەوە.