حکومەتی بەریتانیا بە فەرمی پلانی خۆی بۆ قەدەغەکردنی تۆڕە کۆمەڵایەتییەکان بەسەر منداڵان و مێردمنداڵانی خوار تەمەن 16 ساڵ ڕاگەیاند و بڕیارە لە سەرەتای ساڵی داهاتووەوە بچێتە بواری جێبەجێکردنەوە؛ سەرۆکوەزیرانی ئەو وڵاتەش جەخت دەکاتەوە کە ئەمە هەنگاوێکی پێویستە بۆ پاراستنی سەلامەتیی نەوەی نوێ.

کاتی جێبەجێکردنی بڕیارە نوێیەکە

بەریتانیا ڕایگەیاند، کار بۆ قەدەغەکردنی تۆڕە کۆمەڵایەتییەکان دەکات لە بەکارهێنەرانی خوار 16 ساڵ و بڕیارەکە ساڵی داهاتوودا دەچێتە بواری جێبەجێکردنەوە.

لێدوانی سەرۆکوەزیرانی بەریتانیا لەسەر پڕۆژەکە

کییەر ستارمەر، سەرۆکوەزیرانی بەریتانیا ڕایگەیاند، قەدەغەکردنەکە بەشێک لە تۆڕە کۆمەڵایەتییەکان دەگرێتەوە و دەکرێت لە سەرەتای 2027ـدا بچێتە بواری جێبەجێکردنەوە.

ئامانجی سەرەکیی یاسا نوێیەکە

ستارمەر گوتیشی "دوورخستنەوەی منداڵان لە تۆڕە کۆمەڵایەتییەکان، هەنگاوە ڕاستەکەیە بۆ بەریتانیا و باشترین ڕێگایە تاوەکو سەلامەتییان بپارێزن".

ئەو تۆڕانەی بڕیارەکە دەیانگرێتەوە

قەدەغەکردنەکە تۆڕە کۆمەڵایەتییەکانی سناپچات، تیکتۆک، یوتیوب، ئینستاگرام، فەیسبووک و ئێکس دەگرێتەوە.

سنووردارکردنی تەمەنی خوار 18 ساڵ

هاوكات بڕیارەکە ژمارەیەک سنووردارکردنیشی بۆ کەسانی خوار تەمەن 18 ساڵ تێدا دەبێت کە وردەکارییەکەی لە مانغی تەممووزدا دەخرێتەڕوو.

ئەزموونی وڵاتانی تر لەم بوارەدا

ئوسترالیا، کەنەدا، بەڕازیل و ئیندۆنیزیا، دەستڕاگەیشتنی منداڵانیان بە تۆڕە کۆمەڵایەتییەکان سنووردار کردووە و ڕێکاری جیاوازیان گرتووەتەبەر.

ئەو دەوڵەتانەی لێکۆڵینەوە لە قەدەغەکردن دەکەن

فەڕەنسا، ئیسپانیا، دانیمارک، تایلەند و کۆریای باشوور لەنێو ئەو وڵاتانەدان کە لێکۆڵینەوە لە ڕێبازی هاوشێوە دەکەن یان پەرەی پێدەدەن.

بەراوردی ڕێکارەکانی بەریتانیا لەگەڵ ئوسترالیا

لە 10ـی کانوونی یەکەمی ساڵی ڕابردوودا، ئوسترالیا بووە یەکەم وڵاتی جیهان کە تۆڕە کۆمەڵایەتییەکانی لە کەسانی خوار 16 ساڵ قەدەغە کرد. ستارمەر دەڵێت، ڕێکارەکانی بەریتانیا لەوانەیە کەمێک توندتر بن لە قەدەغەکردنەکەی ئوسترالیا.