گوتەبێژی وەزارەتی دەرەوەی ئێران، ئیسماعیل بەقائی، وردەکاریی یاداشتی لێکتێگەیشتنی نێوان تاران و واشنتنی ئاشکرا کرد. بەقائی ڕایگەیاند، بەپێی ئەم یاداشتە، ئەمریکا پابەند کراوە بە هەڵگرتنی تەواوی سزاکان و کۆتاییهێنان بە شەڕ لە لوبنان. هاوکات، هۆشداریشیدا کە ئێران هیچ متمانەیەکی بە لایەنی ئەمریکی و ئیسرائیلی نییە و تەنیا چاودێری کردارەکانیان دەکات.

هەڵگرتنی سزاکان و پرسی ئەتۆمی

بەقائی گوتی، بەپێی یاداشتەکە، لایەنی ئەمریکی پابەند کراوە بە هەڵگرتنی هەموو جۆرە سزاکان، لەوانەش سزاکانی سەرەتایی و لاوەکی، بڕیارنامەکانی ئەنجوومەنی ئاسایش و ئاژانسی نێودەوڵەتی وزەی ئەتۆمی. ئاماژەی بەوەشدا: "لە ماوەی 60 ڕۆژ دوای واژۆکردنی یاداشتەکە، گفتوگۆی ورد دەربارەی پرسی ئەتۆمی و هەڵگرتنی سزاکان ئەنجام دەدرێت کە ئەمە بناغەی باسە ئابوورییەکانە."

فرۆشتنی نەوت و بەرهەمە پترۆکیمیاییەکان

گوتەبێژەکەی وەزارەتی دەرەوە جەختی کردەوە، دوای واژۆکردنی یاداشتەکە لە رۆژی هەینیدا، ئێران دەبێت بتوانێت بەبێ هیچ ئاستەنگێک نەوت و بەرهەمە پترۆکیمیاییەکانی بفرۆشێت.

گەرووی هورمز: باج یان خزمەتگوزاری؟

سەبارەت بە گەرووی هورمز، بەقائی روونیکردەوە: "ئێمە بەدوای وەرگرتنی باج دا نین، بەڵکوو تێچووی ئەو خزمەتگوزارییانە وەردەگرین کە پێشکەشی دەکەین، وەک ڕێبەریی کەشتیوانی و پاراستنی ژینگە."

متمانە بە ئەمریکا و ئیسرائیل نییە

بەقائی دووپاتی کردەوە کە کۆتاییهێنان بە شەڕ لە لوبنان بەشێکی گرنگی ئەم رێککەوتنەیە، بەڵام هیچ متمانەیەکیان بە ئەمریکا و ئیسرائیل نییە. گوتی: "ئێمە هیچ متمانەیەکمان بە ئەمریکا و ئیسرائیل نییە، چونکە لە رابردوودا راستگۆییان نیشان نەداوە. ئەمریکا دەبێت نیگەرانی سیستەمی بڕیاردانی خۆی بێت کە کەوتووەتە ژێر کاریگەری لۆبییە توندڕەو و شەڕخوازەکان."

سەلامەتی تیمی تۆپی پێی ئێران

لە وەڵامی پرسیارێکدا دەربارەی سەلامەتی تیمی نیشتمانی تۆپی پێی ئێران، بەقائی ئاماژەی بەوەدا: "خۆشبەختانە کەمپی تیمی ئێران لە ئەمریکا نییە، بەڵکوو لە مەکسیکە و سوپاسی میوانداری بەرپرسانی مەکسیک دەکەین بۆ ئەو رێوشوێنە ئەمنییە باشانەی گرتوویانەتە بەر."

لە کۆتاییدا، بەقائی جەختی کردەوە کە کۆمەڵگەی ئێران هۆشیارە و چاودێری وردی جێبەجێکردنی بەڵێنەکانی لایەنی بەرامبەر دەکات، هەروەها تاران ئامادەی هەموو ئەگەرەکانە بۆ پاراستنی بەرژەوەندییە نیشتمانییەکانی.