وتەبێژی وەزارەتی دەرەوەی ئێران هۆشداری دەداتە واشنتن دەربارەی جێبەجێکردنی بەندەکانی یاداشتی لێکتێگەیشتن و ڕایدەگەیەنێت وردەکارییە ئەتۆمییەکان لە دەقی ڕێککەوتنەکەدا جێگیر نەکراون.

بەرپرسیارێتیی واشنتن بەرامبەر هاوپەیمانەکانی

ئیسماعیل بەقائی، وتەبێژی وەزارەتی دەرەوەی ئێران ڕایگەیاند، ئەمریکا پابەندە و ئەرکی سەرشانیەتی ڕێز لە یاداشتنامەی لێکتێگەیشتنەکە بگرێت. بەقائی جەختی لەوە کردەوە کە لایەنی ئەمریکی بەرپرسیارە لە هەر پێشێلکارییەک کە لەلایەن "لایەنی دیکە" یان هاوپەیمانەکانی واشنتن لە ناوچەکەدا ئەنجام بدرێت، ئەمەش وەک ئاماژەیەک بۆ پابەندکردنی ئیسرائیل و وڵاتانی دیکە بە ڕێککەوتنەکەوە.

پرسی ئەتۆمی و یۆرانیۆمی ئێران

سەبارەت بە دەنگۆی چوونە ناوەوەی هێزەکانی ئەمریکا بۆ ناو خاکی ئێران بە مەبەستی بردنی یۆرانیۆمی پیتێنراو، وتەبێژی وەزارەتی دەرەوەی ئێران ڕایگەیاند، ئەمریکییەکان جارێک ئەو کارەیان تاقیکردووەتەوە و ئەنجامەکەیان بینیوە، بۆیە ئەگەر ژیر بن دووبارەی ناکەنەوە. هاوکات ئاشکرای کرد کە لە دەقی یاداشتنامەی لێکتێگەیشتنەکەدا، بە هیچ شێوەیەک باسی وردەکارییەکانی پرسی ئەتۆمی نەکراوە.

تێچووی خزمەتگوزاری لە گەرووی هوورمز

لە تەوەری گەرووی هوورمزدا، ئیسماعیل بەقائی ڕایگەیاند، ئێران بەدوای وەرگرتنی "باج و سەرانە"دا نییە لە گەرووەکە، بەڵام لە بەرامبەر ئەو خزمەتگوزارییانەی پێشکەشی دەکەن، تێچووە پێویستەکان دیاریی دەکرێن و وەردەگیرێن. ئەمەش وەک ئاماژەیەک بۆ ڕێکخستنەوەی جووڵەی کەشتیوانی لەو ناوچە ستراتیژییەدا.