لێدوانەکانی سەرۆکی ئەمریکا لەبارەی ڕێککەوتن لەگەڵ ئێران و کردنەوەی گەرووی هوورمز، نرخی نەوتی برێنتی بۆ خوار 78 دۆلار دابەزاند.

دابەزینی نرخی نەوت لە بازاڕەکاندا

لێدوانەکانی دۆناڵد ترەمپ لەبارەی ڕێککەوتن و کردنەوەی گەرووی هوورمز، نرخی نەوتی برێنتی بۆ 78 دۆلار دابەزاند، هاوکات نرخی نەوتی خاوی تێکساس بۆ 76 دۆلار دابەزی. ئەم گۆڕانکارییە خێرایە لە بازاڕەکانی وزەدا دوای ئاماژە ئەرێنییەکانی واشنتن بۆ تاران دێت.

کردنەوەی گەرووی هوورمز و ڕێککەوتنی سویسرا

دۆناڵد ترەمپ، سەرۆکی ئەمریکا لە کۆبوونەوەی گرووپی 7 لە فەڕەنسا جەختی کردەوە، گەرووی هوورمز "بە تەواوی دەکرێتەوە" کاتێک ڕۆژی هەینی ڕێککەوتنی فەرمی لە سویسرا واژۆ دەکرێت. میدیاکانی ئێرانیش پشتڕاستیان کردەوە کە پێشوەختە 3 تانکەری نەوت و 2 کەشتیی بارهەڵگر بە گەرووەکەدا تێپەڕیون، ئەمەش وەک ئاماژەیەک بۆ کۆتاییهێنان بەو ئابڵۆقەیەی کە لە 28ـی شوباتی ڕابردووەوە دەستی پێکردبوو.

لادانی سزاکانی سەر نەوتی ئێران

ڕۆژنامەی "وۆڵ ستریت جۆرناڵ" بڵاوی کردەوە، واشنتن سزاکانی سەر نەوتی ئێران لادەبات و ڕێگە بە تاران دەدات دەستبەجێ نەوت و سووتەمەنی بفرۆشێت. ئەم هەنگاوە دوای زنجیرەیەک گفتوگۆی چڕ دێت بۆ کەمکردنەوەی گرژییەکانی ناوچەکە و گەڕانەوەی ئێران بۆ بازاڕی جیهانیی نەوت.

یەدەگی ستراتیژیی ئەمریکا و پێویستیی کڕینی نەوت

ئەم گۆڕانکارییانە لە کاتێکدایە کە ئامارەکان نیشانی دەدەن یەدەگی نەوتی ستراتیژی ئەمریکا بۆ نزمترین ئاست لە ساڵی 1983ـوە دابەزیوە. بەو هۆیەوە واشنتن پێویستی بە کڕینی بڕێکی زۆری نەوت دەبێت بۆ پڕکردنەوەی کۆگاکانی لە دوای قۆناغی جەنگ، ئەمەش هۆکارێکی دیکەی نەرمبوونی هەڵوێستی ئەمریکایە بەرانبەر هەناردەی نەوتی ئێران.