دوای پێنج ڕۆژ لە هەوڵە بەردەوامەکانی تیمەکانی بەرگریی شارستانی، ئەمڕۆ تەرمی توانا نەجم، ئەو پێشمەرگەیەی لە کاتی مەلەکردندا لە قوڵایی بەنداوی گۆمەسپان خنکا، دۆزرایەوە.

دۆزینەوەی تەرمەکە دوای 5 ڕۆژ لە گەڕان

شاخەوان سەعید، گوتەبێژی بەرگریی شارستانی هەولێر بە کەناڵ8ـی ڕاگەیاند، ئەمڕۆ چوارشەممە کاتژمێر 10:50 خولەک، تەرمی ئەو گەنجەیان دۆزیوەتەوە کە لە ڕۆژی شەممە 13ـی حوزەیرانەوە لە بەنداوی گۆمەسپان خنکا بوو. پرۆسەی گەڕان بەهۆی قوڵیی بەنداوەکە و لێڵیی ئاوەکەوە 5 ڕۆژی خایاندووە.

ناسنامەی قوربانییەکە و هۆکاری خنکانی

ئەو گەنجەی تەرمەکەی دۆزراوەتەوە ناوی (توانا نەجم)ـە، لەدایکبووی ساڵی 2004ـە و پیشەی پێشمەرگە بووە. ناوبراو لە کاتی مەلەکردندا لە بەنداوەکە خنکاوە و تیمەکانی غەواس بەهۆی خراپیی بارودۆخی ناو ئاوەکە نەیانتوانیوە لە ڕۆژانی یەکەمدا تەرمەکە بدۆزنەوە.

بەرزبوونەوەی ئاماری خنکان لە هەولێر

بە دۆزینەوەی تەرمی ئەم پێشمەرگەیە، ئاماری خنکان لە سنووری پارێزگای هەولێر لە سەرەتای ساڵی 2026ـەوە تاوەکو ئێستا بۆ 7 کەس بەرزبووەوە. ئەم حاڵەتانە لەناو ڕووبار، چەم و بەنداوە جیاوازەکانی سنووری پارێزگاکە تۆمارکراون.