ئەمڕۆ پاش نۆ ڕۆژ لە کەوتنە ناو ئاوى چەمى زەڵم لە ناوچەى هەورامان، تەرمى ڕوقیە ڕافد-ـى 11 ساڵان دۆزرایەوە و تەرمێکى سارد و سڕى ناو ئاوەکە بووە دوایین دیدارى نێوان خۆى و باوکى کە نۆ ڕۆژە چاوەکانى ئاو، دارو بەردى هەورامانى لێ بووە بە ڕوقیە.

خێزانی ڕوقیە لە کەربەلاوە هاتبوون بۆ کوردستان

ڕوقیە لە کەربەلاوە هاتبووە کوردستان، خۆى و خێزانەکەى لە نۆى حوزەیران گەیشتنە سەرچاوەى زەڵم کە یەکێکە لە ناوچە گەشتیارییەکانى سنوورى پارێزگاى هەڵەبجە و هەورامان و دیمەنى جوان و دڵڕفێنى ناوچەکە ساڵانە هەزاران گەشتیار بۆ ناوچەکە ڕادەکێشێت.

ڕوقیە کاتێک دەچێتە نزیک سەرچاوەى زەڵم، وێنەیەک لە نزیک ئەو ئاوە تۆمار بکات و لەناو مۆبایلەکەى بمێنێتەوە، کاتێک گەیشتەوە کەربەلا، لەناو گەرما و لم و خۆڵى بیابان وێنەکە ببێتەوە شنەى باى سەر ئاوى سەرچاوەى زەڵم و فێنکى بکاتەوە، بەڵام بێ ئاگا لەوەى ئەو وێنەیە دەبێتە دوایین یادگارى ئەو بۆ دایک و باوک و کەسوکارەکەى.

هەڵوێستی جوامێری مەردایەتی کورد لەم کۆستەدا

کورد لە مێژوودا بە هەڵوێستى جوامێرى و مەردایەتى ناسراوە، خەڵکى هەڵەبجە و هەورامان بەیەک دەنگ خۆیان کردە کەسوکارى ڕوقیە و لە یەکەم ساتى کەوتنە ناو ئاوى ئەم کچە نەوجەوانە، دەستیان لەکارى خۆیان هەڵگرت، درگاى دووکانەکانیان داخست، ڕەز و باخەکانیان جێهێشت و خۆیان خستە ناو ئاو بن بەرد بە بەرد و  دار و ئەو گۆماوانە دەگەڕان کە گومانیان هەبوو روقیەی تێدابێت.

گەڕان بە دوای تەرمی ڕوقیە هەڵەبجە و هەورامانی تێپەڕاندا

گەڕان بەدواى تەرمى ڕوقیە سنوورى هەڵەبجە و هەورامانى تێپەڕاند و لە سلێمانى، هەولێر و ئیدارەى سۆرانەوە مەلەوان و تیمەکانى بەرگریى شارستانى خۆیان گەیاندە زەڵم و ئەحمەد ئاوا، دەستیان بەگەڕان بەدواى تەرمەکە کرد.

گەنجێکی ناوچەکە تەرمەکەی دۆزیوەتەوە

دواجار ئەمڕۆ پاش نۆ ڕۆژ لەلایەن گەنجێکى ناوچەکەوە تەرمەکەى دۆزرایەوە، عابدین عەبدولرەحمان - بەڕێوبەری بەرگریی شارستانی هەڵەبجە بەکەناڵ8ـی ڕاگەیاند "لەنزیکى ئەو ناوچەیەی  کە گەشتیارە 11ساڵانەکە کەوتە خوارەوە، تەرمەکەمان دۆزیوەتەوە".

تیمەکانى بەرگریى شارستانى ئاگادارکرانەوە و تەرمەکەیان گواستەوە پزیشکى داد، ئەمە بووە دوایین دیدارى نێوان ڕوقیە و هەورامان و هەرێمى کوردستان.