وەزارەتى ناوخۆى عێراق ڕوونکردنەوەیەکى لەبارەى هێرشکردنە سەر هاوڵاتییەک لە شارى نەجەف لەلایەن ئەفسەرێک و دوو کارمەندى هاتوچۆى پارێزگاکە بڵاوکردەوە.

پێکهێنانی ئەنجوومەنی لێکۆڵینەوە

لە ڕوونکردنەوەکەى وەزارەتى ناوخۆى عێراق ئاماژە بەوە کراوە، حسێن عەوادى، بریکاریى وەزیرى ناوخۆ بڕیاریدا بە پێکهێنانى ئەنجوومەنێکى لێکۆڵینەوە لەبارەى ئەفسەرێک و دوو کارمەندى هاتوچۆى پارێزگاى نەجەف، بەهۆى هێرشکردنە سەر هاوڵاتییەک.

دەستبەسەکردنی ئەفسەرێک و دوو کارمەندی هاتووچۆ

بەگوێرەى ڕاگەیێنراوەکە، بریکارى وەزارەتى ناوخۆ فەرمانى کردووە بە دەستبەسەرکردنیان و بەجێهێنانى ڕێکارە پێویستییە یاساییەکان بەرامبەریان.

هیچ نەرمییەک نانوێنن

لە ڕاگەیێنراوەکەدا باس لەوەکراوە، بریکارى وەزیرى ناوخۆ جەختى لەسەر ئەوە کردووەتەوە، وەک وەزارەتى ناوخۆ لە بەرامبەر هەر کردەوەیەکى لەو جۆرە نەرمى نانوێنن و ئەرکى لە پێشینەى کارمەندانى ئاسایش پاراستنى هاوڵاتییان و خزمەتکردنیانە.

بڵاوکردنەوەى گرتە ڤیدیۆیەک لە تۆڕە کۆمەڵایەتییەکان کە تیایدا ئەفسەرێک و دوو کارمەندى هاتوچۆى پارێزگاى نەجەف هێرشدەکەنە سەر هاوڵاتییەک کاردانەوەى زۆرى لە سۆشیاڵ میدیا دروست کرد.