سەرۆکی هەرێمی کوردستان لەگەڵ دەستەی سەرۆکایەتیی ئەنجوومەنی نیشتمانیی کوردی لە سووریا (ئەنەکەسە) کۆبووەوە و گرنگی بەشداريی کورد لە پرۆسەى سیاسی و یاسایی و کارگێڕییەکانی سووریایان تاوتوێ کرد.

بەشدارى کورد لە پرۆسەى سیاسی

سەرۆکایەتی هەرێمی کوردستان بڵاویکردەوە، نێچیرڤان بارزانی، سەرۆکی هەرێمی کوردستان، لەگەڵ دەستەی سەرۆکایەتیی ئەنجوومەنی نیشتمانیی کوردی لە سووریا (ئەنەکەسە) کۆبووەوە، جەختیان لە گرنگی بەشداريی کورد لە پرۆسەی سیاسی و دامەزراوە سیاسی، یاسادانان و کارگێڕییەکانی سووریادا کردەوە، وەک بنەمایەکی سەرەکی بۆ مسۆگەرکردنی مافە ڕەواکانیان.

پتەوکردنى پەیوەندییەکان لەگەڵ دیمەشق

لە کۆبوونەوەکەدا، هەردوولا جەختیان لەسەر پەرەپێدانی پەیوەندی و هاوکاریی هاوبەش لەگەڵ دیمەشق، لە پێناو دۆزینەوەی چارەسەرێکی گشتگیر بۆ کێشە سیاسییە هەڵپەسێردراوەکان، بەو شێوەیەی کە ئاساییش و سەقامگیری بپارێزێت کردەوە.

ڕۆڵ و کاریگەریی ئەنەکەسە

هاوکات، دوایین پێشهاتەکانی سووریا، بارودۆخی کورد و ناوچە کوردییەکان لەو وڵاتە، لەگەڵ هەڵبژاردنەکانی ئەم دواییەی ئەنجوومەنی گەل له‌ سووريا تاوتوێ کران، لەو چوارچێوەیەدا، نێچیرڤان بارزانی جەختی لەسەر ڕۆڵ و ئامادەیی کاریگەری ئەنەکەسە و گرنگیی یەکهەڵوێستیی کورد لە سووریا و بەردەوامیی گفتوگۆ و لێکتێگەیشتنی نێوان سەرجەم لایەنە کوردییەکان کردەوە.

هەروەها، مەترسییەکانی داعش و جموجوڵەکانی ئەم دواییەی لە ناوچەکەدا، گرنگی سەردانەکەی تۆم باراک، نێردەی تایبەتی سەرۆکی ئەمریکا بۆ کاروباری عێراق و سووریا بۆ هەولێر و کۆبوونەوەى هاوبەشی لەگەڵ نێچیرڤان بارزانی و مەزڵووم عەبدی، تەوەرێکی دیکەی کۆبوونەوەکەیان بوو.